Војводата и војвотката од Сасекс објавија нова слика од нивниот син Арчи за да го прослават неговиот 2. роденден.
Сликата, која е објавена на страницата Арчивел, го покажува синот на принцот Хари и Меган, кој е роден на 6 мај 2019 година, како држи балони. Посетителите на веб-страницата се поздравени со сликата заедно со порака во која се вели: „Придружете ни се во залагањето за правичност на вакцините на роденденот на Арчи“.
Хари и Меган апелираат до добронамерниците кои сакаат да го одбележат вториот роденден на нивниот син да донираат пари за плаќање на вакцинациите против Ковид-19 во загрозените земји.
Тие издадоа заедничко соопштение во кое им се заблагодаруваат на оние што понудија „топлина и поддршка“ за нивното семејство во последните две години во чест на роденденот на Арчи, гестови што ги оставиле „длабоко трогнати“.
Двојката рече дека е „неверојатно благодарна“ на оние добронамерници кои дале пари за добри цели, волонтирале или собирале донации во име на нивниот син.
Во потпишаната изјава, објавена на веб-страницата на фондацијата Арчивел, Хари и Меган рекоа: „Нема да можеме вистински да се опоравиме сè додека сите, насекаде, немаат еднаков пристап до вакцините. И со таа намера, ве покануваме да придонесете колку што можете – ако имате средства за тоа – за да се донесат вакцини на семејствата во најранливите места во светот“, пренесува „Дејли мејл“.
