Делта сојот на коронавирус предизвикува потешки симптоми и се шири со иста леснотија како што се шират сипаниците, се вели во документот на Американскиот центар за контрола и превенција на болести (CDC), пренесува Си-Ен-Ен.
Документот прикажува необјавени податоци кои покажуваат дека целосно вакцинираните луѓе би можеле да го шират делта сојот со иста брзина како и невакцинираните.
Директорката на CDC, д-р Рошел Валенски ја потврди автентичноста на документот, а за него прв пишуваше „Вашингтон пост“.
„Ова е сериозно. Тоа е еден од најпреносливите вируси за кои знаеме. Сипаниците се на тоа ниво“, рече д-р Валенски опишувајќи ја заразноста на сојот.
CDC треба да објави информации кои ќе ја поддржат неговата одлука за промена на упатствата за целосно вакцинирани лица. Валенски рече дека CDC препорача дури и целосно вакцинирани луѓе да носат маски во затворени простории на места каде што преносот на вируси е висок, пишува Си-Ен-Ен.
Во презентацијата на CDC се вели дека делта варијантата е исто толку пренослива како и сипаниците, при што секое заразено лице инфицира во просек осум или девет други.
Примарниот вирус беше пренослив како и обична настинка бидејќи секое заразено лице во просек го пренесуваше вирусот на уште две лица.
Исто така, ако вакцинираните лица сепак се заразат, тие имаат исто количество вирус во своето тело како и невакцинираните. Тоа значи дека најверојатно ќе можат да заразат некој друг во иста мера како и невакцинираните лица.
Вакцинираните се побезбедни
Сепак, документот покажува дека вакцинираните луѓе се побезбедни.
„Вакцините спречуваат повеќе од 90 проценти од тешките болести, но може да бидат помалку ефикасни во спречување на инфекција или пренесување. Значи, повеќе инфекции и ширење кај населението и покрај вакцинацијата“, се вели во документот, додавајќи дека вакцините го намалуваат ризикот од тешка болест или смрт за 10 пати.
