Потполно нови варијанти на Ковид би можеле да се појават оваа зима, соопшти агенцијата за лекови на Европската унија, но постоечките вакцини треба да ги заштитат луѓето од сериозни болести и смрт.
Додека ЕУ се подготвува да започне кампања за вакцинација пред бранот нови случаи на коронавирус подоцна оваа година, Европската агенција за лекови (ЕМА) нагласи дека вирусот сè уште циркулира и брзо се развива.
- „Може да се појави сосема нова варијанта која не сме во состојба да ја предвидиме денес“, рече шефот за вакцини на ЕМА, Марко Кавалери, на прес-конференција
Затоа европската стратегија е да има широк спектар на ажурирани вакцини кои се приспособени да одговорат на новите варијанти.
ЕМА неодамна одобри вакцини од Pfizer-BioNTech и Moderna кои се приспособени да се борат со подваријантата BA 1 omicron. Верзијата на Pfizer ажурирана за доминантните соеви BA 4 и BA 5 треба да биде одобрена во средината на септември, додека слична вакцина, Modernа, исто така е во подготовка, пишува „Ал Џезира“.
