ИСТРАЖУВАЊЕ ВО ВЕЛИКА БРИТАНИЈА: Ова би можеле да бидат двата најчести симптоми на КОВИД-19 кај децата

Проливот и повраќањето може да бидат важен знак за КОВИД-19 кај децата, изјавија научниците и побараа и тие симптоми да се додадат на постоечкиот список.

Листата на симптоми на КОВИД-19 кај децата засега вклучува само три работи: висока телесна температура, нова и упорна кашлица и губење или промена во осетот за мирис и за вкус.

Бројни студии покажале дека најчести симптоми кај возрасните пак се болка во мускулите, слабост, збунетост, болка во градите и желудочни проблеми. Според студијата на експертите од Кинг колеџот во Лондон, која чека рецензија, главните симптоми може да се поделат во шест главни групи, а една од нив се токму дигестивните проблеми.

Но, сега истражувачите од Кралскиот универзитет во Белфаст потврдиле дека нервозниот желудник е еден од главните симптоми на КОВИД-19 кај децата.

“Во нашата група, проливот и повраќањето беа попрецизни показатели од да речеме, кашлицата, па дури и промената на осетот за мирис и за вкус. Ако навистина сакате да ја дијагностицирате инфекцијата кај децата, обрнете внимание на проливот и на повраќањето, а не само на симптомите во горните дишни патишта“, вели д-р Том Вотерфилд, автор на студијата.

Вотерфилд вели дека и со помош на досега препознатливите симтоми на инфекција со КОВИД-19, заразата прецизно може да се утврди кај 76 проценти од случаевите на симптоматски деца, но кога се додаваат и гастроинтестинални симптоми, тогаш сигурноста на дијагностиката се искачува и до 97 отсто.

Студијата е спроведена помеѓу 6. април и 3. јули и вклучила 990 деца на здравствени работници на возраст од две до 15 години. Никој од нив не бил примен во болница поради КОВИД-19.

Ако навистина сакате да ја дијагностицирате инфекцијата кај децата, обрнете внимание на проливот и на повраќањето, а не само на симптомите во горните дишни патишта, велат научниците.

Земени биле примероци на крв од сите деца во студијата за да се види дали тие имаат антитела кон новиот коронавирус, а податоците биле собрани и за да се утврди дали имаат било какви симптоми.

Научниот тим открил дека 68 деца – 6,9  проценти од вкупниот број – имаат антитела на КОВИД-19 и дека ја прележале болеста. Од нив, само половина имале симптоми.

Некои симптоми биле вообичаени: 31% од децата имале температура, 18% имале главоболка, 19% имале желудочни тегоби како пролив, повраќање и грчеви. Кај децата кои немале антитела, овие симптоми се јавувале во 11, четири и три проценти од случаевите.

И додека само 34% од децата опфатени со студијата имале симптоми, Вотерфилд вели дека овие сознанија се многу важни, бидејќи проливот и повраќањето биле јасен и очигледен проблем за воочување. Тој додава и дека ова е охрабрувачко за родителите, бидејќи тоа ќе значи дека течењето на нос и кивањето – кои во зимскиот период многу често се јавуваат – не се знак на КОВИД-19.