Во текот на бременоста во телото се случуваат бројни промени, а градите се еден од деловите на телото каде неминовно ќе забележите разлика во текот на овие девет месеци.
Како се менуваат градите за време на бременоста
Промените на градите често се и прв знак за бременост. По зачнувањето, телото претрпува драстични промени во нивото на хормоните, при што естрогенот и прогестеронот го преземаат “главниот збор“. Поради сето ова, градите на почетокот стануваат чувствителни и болни, а некои трудници чувствуваат дури и мало трнење.
Причината за сите овие промени се хормоните, вклучувајќи го и пролактинот, кој се лачи во зголемени количини за да може телото на идната мајка да произведува млеко.
Како се менуваат градите по породувањето
Многу идни мајки мислат дека млекото ќе тече од нивните гради во моментот кога ќе се породат, но се чини дека тоа не е така. Прво се произведува колострум или прво млеко, кое е толку здраво што многумина го нарекуваат течно злато. Најчесто има жолтеникава боја и има големо влијание врз имунитетот на бебето.
Новопечените мајки во одреден момент по породувањето ќе почувствуваат напнатост во градите и ќе забележат дека ареолите станале потемни, а млекото ќе дојде во првите неколку дена, додека производството на млеко се нормализира по неколку недели.
Не грижете се ако забележите дека вашите вени се повидливи на градите, тоа се должи на зголемениот проток на крв. И имајте на ум една важна работа, а тоа е дека големината на градите нема врска со тоа дали и колку млеко ќе имате и дали успешно ќе го доите вашето бебе.
Промени на брадавиците
Брадавиците ќе ви станат поцврсти кога ќе почнете да доите, а еве неколку корисни совети:
- Оставете ги вашите гради да се исушат сами по доењето. Тие не смеат да останат влажни.
- Не користете сапун кога се капете, бидејќи тоа ќе ја исуши кожата на вашите гради и ќе ги уништи нивните природни масла.
- Избегнувајте градници кои се премногу тесни бидејќи тоа може да доведе до блокирање на каналите.
- Ако користите влошки за гради, менувајте ги редовно.
- Доколку почувствувате сувост по доењето, нежно масирајте ги со маслиново масло. Потоа оставете ги да се исушат природно.
Како се менуваат градите по доењето
Она што е најверојатно е дека вашите гради ќе станат поопуштени по доењето отколку порано, што е резултат на бројните промени низ кои доживеале вашите гради од бременоста до крајот на доењето. Сепак, какви промени и колку ќе бидат видливи зависи од генетиката, возраста, типот на телото и колку бремености сте имале.
