Иако вашите деца можеби количински доволно јадат, повторувањето на исти намирници на кои што се навикнати може да биде исклучително лошо за нивното здравје. На врвот на листата јадења кои децата секогаш вешто ги избегнуваат се наоѓа варениот зелен зеленчук, но можеби најкорисна намирница за правилен раст и развој на децата што најмал број од нив ја прифаќаат е секако рибата. Ова се неколку совети како тоа да го промените.
ПОЈДОВНА ТОЧКА: ТРПЕНИЕ!
На децата им е потребно повеќе време да прифатат промена. Доколку дојде до изговори, оддолговлечување, а потоа и плачење и одбивање на риба или друга храна, едноставно одложете го оброкот до моментот додека детето не се смири и биде подготвено за нов обид. Искористете мудри начини да им покажете нови работи кои се добри за нив, избегнувајќи уцени и казнување.
Маја Асталош, експерт за правилна и балансирана исхрана вели дека постојат начини да се внесат сите бенифити од рибата или било која друга храна, а децата сепак да ја задржат насмевката на лицето.
“Одличен начин на децата почесто да им се внесе риба во исхраната е рибата да ја подготвите во форма на паштета (при чија подготовка ќе ставите и зеленчук) и како намаз на интегрален леб да му ја понудите на детето. Секако и комбинирањето на риба со омилениот зеленчук на детето е секогаш добитна комбинација. Повеќето видови на риба може да се подготват на ваков начин, а притоа да не изгубат на квалитет, со што децата ги добиваат сите неопходни нутриенти од неа. Рибата е богата со витамин А, кој е неопходен за добар вид, квалитет на кожата и косата. Витаминот Д и калциумот од рибата влегуваат во составот на коските и забите, а јодот и флуорот го забрзуваат метаболизмот и растот на организмот, додека магнезиумот, цинкот и селенот го засилуваат имуниот систем и штитната жлезда. Омега 3 масните киселини од рибата влијаат на квалитетот на сон кај децата, како и на развојот на мозокот“, истакнува д-р Асталош.
