Некои деца го усвојуваат користењето нокшир или тоалет веќе на 2-годишна возраст, но им се потребни уште две години за да ја извадат и ноќната пелена. И покрај тоа што ги преземате сите неопходни мерки на претпазливост пред спиење, како што се одење во тоалет и да не давате течности непосредно пред спиење, вашето дете мокри во кревет. Едноставно, тоа толку цврсто спие ноќе што не може да ја препознае потребата да оди во тоалет.
Сосема е нормално детето да остане суво во текот на ноќта дури на возраст од 4 до 5 години, а кај некои деца незгоди може да се случуваат се до поаѓање во основно училиште.
Мочниот меур на детето мора да биде доволно “зрел“ за да ја задржи урината преку ноќ, а мозокот да биде доволно развиен за да испрати сигнал што го буди детето да оди во тоалет. Статистиката покажува дека на момчињата може да им треба подолго време да се навикнат на тоалетот отколку на девојчињата.
Како и кај дневното одвикнување од пелени, низ кое веќе сте поминале и кое детето ги совладало, мора да бидете сигурни дека детето е подготвено. Ако се буди со сува пелена една недела, можете да се обидете, но очекувајте повремени незгоди.
Кога ќе дојдете во фаза на суви пелени за една недела, свечено соопштете му на детето дека може да почне да спие во гаќички и дека повеќе не му требаат пелени. Потоа не му давајте да пие течност после вечерата, освен ако е жедно, а во тој случај нека биде вода. Поттикнете го детето да моча по миење на забите и непосредно пред спиење.
За да си олесните во тој период, заштитете го душекот со водоотпорна навлака и покрај креветот имајте подготвена сува постелнина и долна облека ако се случи ноќна незгода.
