Според педијатрите, ако детето е во лоша општа состојба, целосно е малаксано, има висока температура над 40 степени која е проследена со треска, односно целото тело му се тресе и неконтролирано му се тресат рацете, нозете и брадата, тоа може да биде знак на продор на бактерии во крвта, односно бактериемија или сепса. Станува збор за состојба која изискува неодложна интервенција на лекар.
Ако проливот потрае повеќе од една недела, не е лошо да се обратите кај стручно лице, потенцираат педијатрите, за да се направи анализа на столицата и да се направи проверка на исхраната. Ако дојде до појава на крв во столицата и висока температура и треска, тоа се состојби поради кои мора да се јавите на лекар, а ако се работи само за пролив кој трае една недела, тогаш е препорачливо во догледно време преглед на детето да направи педијатар.
