Зголемената телесна температура е еден од најчестите симптоми кои се јавуваат кај децата поради разни инфекции. Тоа е природен одбранбен механизам од различни патогени и воопшто не е пријатен, особено кога станува збор за некои повисоки температури.
Она што е важно да знаете е дека некои намирници може да го влошат или да го продолжат времетраењето на овој симптом, а Medical House Calls открива која храна треба да ја избегнувате при висока телесна температура.
Храна со многу шеќер
Слатките, колачињата и засладените напивки можат да влијаат на вашиот имун систем. Прекумерното консумирање шеќер може да предизвика воспаление и да ја ослабне способноста на телото да се бори против инфекции. Слатката храна обезбедува празни калории кои не придонесуваат за нутритивните потреби, што може да доведе до пад на енергијата и дополнително да ја отежне задачата што ја има организмот, а тоа е одбрана од патогени.
Зачинета и масна храна
Зачинетата и масна храна можеби не е многу добра за дигестивниот систем. Зачинетата храна може да го иритира желудникот и да ја влоши мачнината доколку дигестивниот систем веќе е вознемирен. Пржената или мрсната храна тешко се вари и може да доведе до непријатност и лошо варење. Секако, и мрсната и зачинетата храна може да „одземе“ дел од енергијата од телото, која сега му е потребна за борба против инфекцијата, но и за преработка на оваа тешко сварлива храна.
Млечни производи
Додека млечните производи се добар извор на калциум и протеини, тие го зголемуваат производството на слуз, што може да ја отежне борбата против респираторните инфекции. Сепак, некои млечни производи не им пречат ниту кога имаат респираторни инфекции, па затоа треба да внимавате како детето реагира на нив.
Напивки со кофеин
Чајот и некои напивки како што се енергетските пијалаци, кои содржат кофеин, можат да придонесат за дехидрација. Кофеинот е диуретик, што значи дека го зголемува производството на урина. Одржувањето на хидратацијата е клучно за регулирање на телесната температура и одржување на функциите на телото, па затоа треба да се избегнуваат пијалаци со кофеин во случај на инфекции и треска.
Преработена и готова храна
Преработената и готовата храна често содржи високо ниво на натриум, конзерванси и вештачки адитиви. Овие намирници имаат малку добри хранливи материи и можат да придонесат за воспаление во телото. Исхраната богата со преработена храна може да го ослаби имуниот систем, а многу подобра опција е целосната храна богата со хранливи материи.
Храна која е добра при покачена температура
Пред се, најважна е хидратацијата, бидејќи покачената телесна температура поттикнува губење на течности. Најдобрата опција е водата, како и некои билни чаеви (камилица, нане, ѓумбир) и бујони.
Свежото овошје, цитрусно и бобинки, се одличен избор на намирници при покачена температура бидејќи добро делуваат на имунитетот и помагаат во борбата против инфекциите. Бананите се исто така добар избор бидејќи лесно се варат и обезбедуваат калиум, кој е важен за одржување на балансот на електролити.
Кога станува збор за зеленчукот, зелениот лиснат зеленчук и оној од семејството на зелка, како и морковите се препорачливи за консумирање при покачена температура, а истото важи и за немасното месо, рибата, мешунките и интегралните житарки.
Се разбира, храната која содржи пробиотици, како што се јогуртот и кефирот, исто така може да му помогне на телото во борбата против инфекциите.
