Попладневниот сон е исклучително важен за развојот на детето, но потребната количина на сон зависи и од возраста на детето. Главно, повеќето деца откако ќе наполнат три или четири години, повеќе немаат потреба за дневен одмор.
Кога одењето на попладневно спиење ќе стане мачење и за вас и за детето, а нему треба повеќе време да заспие отколку што спие, очигледно е дека неговата дневна потреба за сон е намалена и може да почнете да воведувате некои промени во ритамот на дневните активности.
Еве уште неколку знаци кои упатуваат дека е време да ја прескокнете попладневната дремка:
Детето се спротивставува на спиењето
Наместо нормалната рутина, која до сега ја имало детето, тоа почнува да се пружа отпор. Може да станува од кревет и постојано да негодува поради спиењето.
Добро е расположено и покрај неспиењето
Кога детето ќе престане да спие во текот на денот, но е добро расположено се до легнувањето навечер. Секако дека ќе има подеми и падови, но поголемиот дел од времето ќе биде расположено и полно со енергија.
Лесни утра
И без попладневниот сон, детето добро спие цела ноќ и обично наутро се буди расположено.
Попладневното спиење лошо влијае на ноќниот одмор
Ако детето спие попладне, а навечер му е тешко да заспие, можеби е време да го укинете дневното спиење. Можеби му треба долго време за да заспие или се буди порано наутро.
Период на прилагодување
Секако, постои преоден период од неколку месеци, можеби и половина година, кога на вашето дете повремено ќе му треба дневна дремка, но во најголем дел ќе може и без тоа. Оставете го да спие ако има потреба.
Меѓутоа, ако детето е постаро од шест години и спие секој ден, тоа може да биде знак дека му недостига сон или има пореметување на спиењето и во тој случај разговарајте со педијатар.
Поттикнете го детето времето што го поминало во спиење, да го поминува одморајќи, така што ќе прелистува сликовница, слуша музика или црта. Ова ќе му овозможи да се одмори од физичката активност и да се опушти.
Ако навечер порано станува уморно, треба да го поместите и времето за легнување за спиење. Исто така, потребно е да се следи дали детето спие доволно за да може да се креира нов распоред.
