Храната како најголем сојузник на здравјето, станува уште поефикасно средство во зачувувањето на силниот имунитет. Кои намирници во овој момент е најмудро да се вклучат во исхраната на децата?
Железото е потребно за учење, калциумот и витаминот Д за развојот на коските, витаминот Б12 за силна крв, додека витаминот Ц помага при јакнење на имуниот систем. Една четвртина од шолја зеленчук (варен или свеж) и исто толку овошје и тоа пет пати во текот на денот е општа препорака за деца кои имаат три години. Секако како растат таа количина, како и вкупниот калориски дневен внес треба да се зголеми, но и натаму важи златното правило на балансирана исхрана – пет оброци овошје и зеленчук дневно.
Но, кое овошје и зеленчук сепак се малку подобри од останатите, односно на кои намирници треба да им се даде предимство?
СПАНАЌ ( ЗЕЛЕН ЛИСНАТ ЗЕЛЕНЧУК)
Спанаќот е одличен извор на железо, фолна киселина и витамин А, а добар е и за здравјето на мозокот. Содржи и калциум, магнезиум, калиум, влакна и низа други хранливи состојки кои одлично делуваат на целиот организам. Американската академија за педијатрија предлага готвење на пареа или пире од спанаќ како здрав прилог.
СЛАДОК КОМПИР
Слаткиот компир е богат со витамин А, но и со влакна поради што има најефикасно делување на дигестивниот систем. Во оваа ситуација кога децата помалку се движат и повеќе престојуваат дома ( а со тоа и повеќе грицкаат слатки и други помалку хранливи намирници), бататот ќе помогне во функционирањето на дигестивниот систем. Со оглед дека изобилува со манган, кој е важен за метаболизамот на јаглехидратите, ќе биде благодат и во случајот на домашна изолација кога повеќе се јадат десерти и колачи. Со слаткиот компир ќе се постигне одличен баланас.
БРОКУЛА
Брокулата содржи голема количина на витамин Ц, калиум и железо, кои се важни за силен имунитет. Динствувајте ја додека не омекне, така што детето полесно ќе ја изеде, или од неа сварете густа супа која е најприфатлива за поголем број деца. Брокулата е богата со влакна кои помагаат во варење на храната, и спречува запек.
БОБИНКИ
Ова овошје е богат извор на витамини, минерали и прехранбени влакна. Главните позитивни ефекти по здравјето на децата се вразни со нивните антиоксидантни и противвоспалителни својства. Одлични се и да ги задоволат слатките апетите на децата, а добра вест е дека повеќето деца ги сакаат.
Останати здрави опции, според педијатрите, вклучуваат јаболка, банана, круша, портокал, авокадо и пире од грашок.
