MIS-C влијае врз крвните садови и органи и има симптоми слични на Кавасаки болест и токсичен шок. Вклучува „хипер одговор“ на имунолошкиот систем на детето на вирусот што може да доведе до воспаление на крвните садови и да влијае врз артериите на срцето, што води кон коронарна аневризма
Американскиот центар за контрола и превенција на болести (CDC) официјално ја потврди врската помеѓу коронавирусот и детската воспалителна болест.
Досега познат како „педијатриски мултисистемски воспалителен синдром“, CDC објави нова дефиниција под името „мултисистемски воспалителен синдром кај децата (MIS-C)“.
Градоначалникот на Њујорк, Бил де Бласио изјави дека досега имале 145 пријави за деца со претходно дефинираниот педијатриски мултисистемски воспалителен синдром (PMIS), од кои 67 деца биле тестирани позитивно на COVID-19 или имале антитела.
„CDC ја потврди врската со КОВИД-19. Ова е важно, ние го претпоставувавме, но тие направија дополнително истражување за 100 проценти да го потврдат и објавија национална стандардна дефиниција“, истакна Де Бласио.
Тој додаде дека врската помеѓу коронавирусот и воспалителниот одговор кај децата отсекогаш била сомнителна, но сега откако CDC ја потврди и официјално, тоа им дозволува на градските здравствени власти да ги разгледаат сите претходни случаи под ново водство и извештаи.
Новото име ќе овозможи подобро следење на состојбата, рече тој, затоа што сите држави сега ќе го користат федералниот MIS-C назив наместо индивидуалните имиња што ги користат државните здравствени оддели.
Де Бласио најави дека градските здравствени власти ќе го ажурираат бројот на педијатриски случаи откако ќе ги разгледаат сите претходни случаи со употреба на новата дефиниција MIS-C.
Дополнителни симптоми на синдромот вклучуваат постојана треска, раздразливост или слабост, болки во стомакот, дијареја, повраќање, осип, конјунктивитис, зголемен лимфен јазол од едната страна, црвени испукани усни или црвен јазик, отечени раце и нозе
„Оваа реалност ја сфаќаме многу, многу сериозно“, изјави Де Бласио. Градоначалникот ги замоли родителите да бидат сигурни дека децата внимателно ги следат сите препораки за хигиена – миење раце, носење маска кога е соодветно, кашлање и кивање во лактот – како што би правеле и самите за да спречат зараза со коронавирусот.
Американскиот центар за контрола и превенција на болести (CDC) во четвртокот издаде предупредување до лекарите во врска со болеста којашто почнаа да ја нарекуваат мултисистемски воспалителен синдром кај деца или скратено MIS-C. Во него се дадени насоки за дијагностицирање на MIS-C. Критериумите за дијагностицирање вклучуваат треска од најмалку 38 степени најмалку 24 часа, доказ за воспаление во организмот и хоспитализација со проблеми во најмалку два органи (како што се срцето, бубрезите или белите дробови).
