Нијансата на бебешката столица може да варира од жолта, боја на сенф, до жолто-зелена и зелена, и тоа е сосема нормално. Бојата најчесто зависи од должината на задржување на столицата во цревата. Кога ќе се задржи подолго, може да има зелена боја. Ако бебето нормално напредува и е задоволно, ова не е загрижувачко.
Има неколку причини за појава на зелена столица кај бебињата:
Консумирање на формула збогатена со железо – некои бебиња кои се храната со млечна формула може повремено или постојано да имаат зелена столица. Ако бебето е задоволно и нема опстипација, оваа состојба не е загрижувачка.
Жолтица – новороденче кое има жолтица, може да има зелена столица или темно пребоена столица. Бојата на столицата главно се нормализира, кога нивото на билирубин ќе се врати во нормала.
Пречувствителност на млеко – некои доени бебиња се многу чувствителни на одредена храна во мајчината исхрана. Ако бебето има зелена слузава столица, крв во столицата, црвенило на кожата или постојано бљуцка, можеби е чувствителни на нешто од исхраната на мајката.
Млекото и млечните производи се најчеста причина за ваквата состојба. Ако мислите дека е тоа во прашање, исфрлете го млекото и млечните производи од исхраната. Ќе бидат потребни неколку недели да се воочат резултатите од елиминационата диета. По тој период, испијте чаша млеко. Ако дојде до појава на исти симптоми, значи дека млекото е предизвикувач и треба да го исклучите од исхраната.
Нерамнотежа помеѓу “предното“ и “задното“ млеко – причина столицата да има зелена боја понекогаш е и нерамнотежата помеѓу млекото на почетокот и крајот на подојот. Млекото на почетокот на подојот е поретко и содржи помалку масти. Како одминува подојот, млекото станува помасно, и тоа е т.н. “задно“ млеко. Бебињата кои внесуваат повеќе од првото млеко, може да имаат зелена столица и болки во стомакот. Ова се јавува ако бебето има чести, пократки подои.
