Научниците велат дека во детските градинки циркулираат бактерии поради кои децата би можеле да бидат изложени на зголемен ризик од астма. Како што откриле, децата во градинките, каде доминантни бактерии се Streptococcus и Lactococcus, имаат поголема веројатност да ја развијат оваа состојба.
„Кај децата на возраст под три години, ‘свирењето’ при дишење се смета за ран знак на астма“, вели д-р Анабел Бедар од францускиот Национален институт за здравје и медицински истражувања, која работела на студијата.
Студијата, претставена на меѓународниот конгрес на Европското респираторно здружение во Милано, проучувала како бактериите кои циркулираат во јаслите и во градинките влијаат на ризиците за децата. Истражувачите собрале примероци од прашина од подови на 103 различни градинки во Париз. Истовремено, родителите на 515 деца биле испитувани дали нивните деца имаат некакви симптоми кои обично се поврзани со астма.
Се покажало дека градинките во кои биле доминантни бактериите Streptococcus и Lactococcus почесто се поврзуваат со појава на симптоми на астма од оние во кои преовладувале соевите на бактериите Neisseria и Haemophilus.
„Бактериите и другите микроби живеат насекаде околу нас, а ние почнуваме да сфаќаме дека тие можат да имаат и позитивни и негативни ефекти врз нашето респираторно здравје. Имаме уште многу да научиме за овие сложени заедници и како нашите тела реагираат на нив. Студијата сугерира врска помеѓу респираторното здравје на малите деца и мешавината на бактерии во дневните установи што ги посетуваат“, коментира професорката Ангела Захарасиевич од Европското респираторно здружение.
Според Светската здравствена организација, дури 300 милиони луѓе страдаат од астма и таа е најчеста хронична болест кај децата. Најчестите симптоми на астма се напади на сува кашлица, чувство на немање воздух, звук на свирење или пискање при дишење и притисок во градниот кош. Развојот на астма е поверојатен кај оние кои страдаат од алергија, но нејзината точна причина е непозната.
