Респираторен синцицијален вирус или РСВ е заразен вирус кој предизвикува инфекции на дишните патишта, и додека за возрасните и постарите деца е како настинка, кај доенчињата и малите бебиња може да предизвика компликации.
РСВ се јавува периодично и во голем број, секако во есенскиот и зимскиот период, ги зафаќа дишните патишта, а од него најчесто се разболуваат децата. Иако повеќето деца поминуваат без компликации, помалите деца може да завршат во болница. Околу една третина од децата ќе развијат симптоми на бронхиолитис или пневмонија. Најопасен е за доенчиња под шест месеци и деца кои се родени предвреме или се со ослабен имунолошки систем и/или основни проблеми со срцето, белите дробови или невромускулни проблеми, според Американскиот центар за контрола и превенција на болести.
РСВ може брзо да се шири, а може да се пренесе со едноставен контакт со капки од заразено лице или со допирање на површина на која се наоѓа вирусот и потоа со допирање на лицето пред да се измијат рацете
Д-р Шон Кален од Њујорк имал 9 години кога неговиот деветмесечен брат Кевин починал од респираторен синцицијален вирус. Денес, речиси 30 години подоцна, Кален работи како неонатолог во Њујоршката болница за жени и новороденчиња, но учествува и во лабораториски истражувања на оваа тема. Инаку, тоа е истата болница во која се лекувал неговиот брат, кој бил роден со вродена срцева мана, а таквите деца се изложени на поголем ризик од компликации од РСВ.
Кален за „Добро утро Америка“ изјави дека сè уште се сеќава на „длабокиот шок“ што го почувствувал кога неговите родители му кажале дека брат му починал. Во неговата сегашна улога и како неонатолог и како истражувач, Кален рече дека сака родителите да дознаат каков напредок е постигнат во изминатите три децении кога станува збор за лекување и превенција на РСВ, вирус кој е толку чест што скоро сите деца го добиваат во одреден период до својот втор роденден.
Во моментов нема лекови развиени специјално за лекување на РСВ, но има нови вакцини и лекови кои помагаат да се спречи ширењето на вирусот. РСВ може брзо да се шири, а може да се пренесе со едноставен контакт со капки од заразено лице или со допирање на површина на која се наоѓа вирусот и потоа со допирање на лицето пред да се измијат рацете.
Д-р Кален споделува шест совети кои сите родители и старатели треба да ги знаат и да ги усвојат за да ги заштитат бебињата и децата од РСВ.
- Искористете ги достапните лекови
Уште додека е бремена, мајката може да го заштити новороденчето со вакцина. Вакцината што ќе ја прими трудницата, а која неодамна стана достапна, пренесува антитела на плодот, па новороденчето е заштитено. Вакцината им се дава на трудниците во третиот триместар, помеѓу 32 и 36 недела.
- Избегнувајте големи групи луѓе во затворен простор
Избегнувајте настани во затворени простори што е можно повеќе и места каде што има многу луѓе. Имајте на ум дека е важно да имате семејство и пријатели како систем за поддршка, а продавниците да ги посетувате по потреба и без дете.
- Поттикнете ја навиката за миење раце
Секој што доаѓа во контакт со детето треба да ги измие рацете, особено пред да го држи детето.
- Проверете дали посетителите се вакцинирани
Препорачајте им на оние кои го посетуваат вашето семејство да се вакцинираат со сезонски вакцини – оние против РСВ (ако имаат 60 или повеќе години), грип и КОВИД-19.
- Забранете ја посетата
Не прифаќајте посета од кој било што покажува какви било знаци на респираторно вирусно заболување, како што се треска, течење на носот или кашлица.
- Разговарајте со вашиот педијатар
Разговарајте со вашиот педијатар за загрижувачките знаци и симптоми на респираторна вирусна болест која можеби ќе треба да се процени и прегледа од страна на лекар. Конкретно, тоа се дехидрација (т.е. недостаток на апетит, повраќање, дијареја, намален број на влажни пелени) и респираторен дистрес (т.е. забрзано дишење, користење на дополнителни мускули за дишење).
