Редовното вежбање и физичката активност можат да бидат многу корисни за децата, пренесува Times of India. Како што покажува најновата студија објавена во списанието Journal of Science and Medicine in Sport, секојдневното вежбање може да им помогне на децата на училишна возраст полесно да се справат со стресот.
Истражувачите откриле дека децата на училишна возраст кои вежбаат повеќе од еден час дневно имаат пониски нивоа на кортизол, хормонот на стресот, од оние деца кои не вежбаат. Како што објаснуваат експертите, токму нивото на кортизол во организмот е исклучително важно за управување со стресот, но и за одржување на здравјето воопшто.
„Се чини дека редовно активните деца имаат намален физиолошки одговор на стресот отколку децата кои не се движат колку што треба или не поминуваат доволно време на отворено“, вели Мануел Ханке, еден од главните автори на споменатата студија. Со неговото мислење се согласуваат и неговите колеги.
„Кога децата редовно се движат, скокаат, вежбаат или се качуваат, тие се помалку подложни на стрес и се поотпорни на какви било ситуации кои би биле проблем за другите. Покрај тоа, нивното тело почнува да го поврзува кортизолот со нешто позитивно. Реакцијата на телото секогаш има когнитивна компонента, а нејзината позитивна асоцијација помага да се спречат проблеми со концентрацијата, што е добро кога децата имаат тест или одговор на училиште“, додава професорот Себастијан Лудига.
