Алергиите на храна денес погодуваат приближно едно од 13 деца, а нивната зачестеност е зголемена за дури 50% помеѓу 1997 и 2011 година. Експертите сметаат дека тоа се должи на неколку фактори, меѓу кои исхрана богата со преработени намирници, недостаток на витамин Д поради недоволно изложување на сонце и т.н. хигиенска хипотеза. Оваа хипотеза сугерира дека поради почиста околина, децата доаѓаат во контакт со помалку микроби, што може да доведе до претерана реакција на имуниот систем на одредени намирници.
Меѓутоа, неодамнешно истражување спроведено во Шведска, објавено во списанието Pediatric Allergy and Immunology, покажува дека еден од клучните фактори може да биде и предоцното воведување на алергенска храна во исхраната на доенчињата.
Разновидната исхрана на деветмесечна возраст го намалува ризикот од алергии
Научниците анализирале податоци од 2.060 бебиња и откриле дека бебињата кои консумирале разновидна исхрана на 9-месечна возраст, што значи дека јаделе 13 или 14 различни намирници, имале 45% помал ризик од развој на алергии на храна до 18-месечна возраст. Интересно е тоа што истиот заштитен ефект не бил забележан кај бебињата кои почнале да примаат разновидна исхрана порано, на пример на возраст од шест месеци.
Оваа врска остана силна дури и кога истражувачите ја земале предвид семејната историја на алергии, времетраењето на доењето и степенот на образование на мајката. Тие, исто така, забележале дека децата кои имале егзема може особено да имаат корист од раното воведување на разновидна исхрана.
Кои намирници ги проучувале?
Родителите пополнувале прашалници за прехранбените навики на нивните бебиња на возраст од 6 и 9 месеци. Посебно се следело консумирањето на 14 различни намирници, од кои шест се познати алергени:
- Пченица
- Јајца
- Риба
- Млечни производи
- Јаткасти плодови (особено кикирики)
- Соја
До 18 месеци животм, на стотина деца вклучени во студијата им биле дијагностицирани алергии на храна. Најчесто се јавувале алергии на кравјо млеко (69 случаи) и јајца (35 случаи).
Како исхраната влијае на развојот на алергиите?
Иако алергиите на храна во голема мера се генетски детерминирани, ова истражување покажува дека исхраната на бебињата на возраст од 9 месеци може значително да влијае на ризикот од развој на алергии.
„Повтореното изложување на одредени видови храна во раното детство е од клучно значење за развојот и одржувањето на толеранцијата“, истакнуваат научниците.
Тие, исто така, ја истакнаа важноста од редовно консумирање на храна од растителна основа – овошје, зеленчук и мешунки – бидејќи тие се богати со влакна и витамини, кои можат да помогнат да се намали ризикот од алергии.
Потврда од претходни истражувања
Овие резултати се во согласност со претходни студии кои укажуваат на важноста од рано воведување на алергенска храна во исхраната. На пример, една студија од 2019 година покажала дека на бебињата на кои им била дадена храна која содржи кикирики помеѓу 4 и 6 месечна возраст, постоел помал ризик да развијат алергија на кикиритки.
Друга студија, спроведена минатата година, ги потврдила овие наоди: децата кои редовно јаделе кикирики во форма на паста или пире до петгодишна возраст имале 71% помали шанси да развијат алергија на кикирики во споредба со оние деца кои не ги консумирале.
Сите овие истражувања покажуваат дека начинот и времето на воведување на храна во исхраната може да влијае на веројатноста за развој на алергија или чувствителност на одредена храна.
