Мајка од Сафолк, Англија му се заблагодари на персоналот на NHS кој се грижеше за нејзиното петмесечно бебе откако се зарази со коронавирус. Малата Амелија Вуџер била пренесена во болница во саботата, 4 април, откако нејзините симптоми, кои наликувале на настинка, се влошиле.
Таа поминала три ноќи во „West Suffolk Hospital“, откако била позитивна на тестот за Ковид-19. Нејзината мајка Емили Вуџер изјави дека тоа го очекувала веднаш откако Амелија била примена во болницата.
„Знаев уште пред да дојдат во собата. Ги видов како се подготвуваат со цела заштитна опрема“, изјави мајката за „ITV News“.
Петмесечната Амелија била третирана со антибиотици, а таа и семејството сега се дома во самоизолација.
Како што вели Емили, искуството со нејзиното бебе ја натерало да сфати колку е важно луѓето да ги следат препораките за изолација.
„Мислевме дека има само настинка минатата недела… Тоа веројатно беше почетокот на ова, затоа сите треба да останат дома, бидејќи некои луѓе можеби и не знаат дека се инфицирани“.
Емили испрати фотографија од насмеаната Амелија во „West Suffolk Hospital“ со пораката „Благодарам на NHS“, а оттаму ја споделија на социјалните мрежи.
