Едно од најчестите прашања што ми ги поставуваат родителите е како да знаат дали нивните деца ги добиваат вистинските хранливи материи, вели нутриционистката Џенифер Андерсон за CNBC.
„Вистина е дека многу деца не ја внесуваат соодветната количина на хранливи материи кои се од витално значење за растот, спречувањето на хронични болести и целокупното здравје. Растителните влакна и калиумот се важни. Но, број еден нутриент кој децата (во САД) не го добиваат доволно е витаминот Д. Педесет проценти од децата на возраст од 1 до 5 години и 70% од децата на возраст меѓу 6 и 11 години имаат недостаток на витамин Д“. истакнува таа.
Зошто е неопходен витаминот Д?
- За силни коски и мускули – без него, нашето тело не може ефикасно да го апсорбира калциумот, а калциумот ни е потребен за здрави коски.
- Дете со тежок дефицит на витамин Д може да има рахитис и со него поврзани состојби, вклучувајќи неправилен раст, болки во коските и деформитети на зглобовите.
- Почесто, кога детето нема доволно витамин Д, неговиот имун систем може да не работи правилно или може постојано да се чувствува уморно или болно.
Самото изложување на сонце често не може да ги задоволи потребите за витамин Д. Ова се два начини на кои родителите можат да им помогнат на своите деца да добијат повеќе од овој витамин:
1. Храна
- Масна риба, како лосос, пастрмка или сардина
- Говедски црн дроб, жолчки од јајце и сирење
- Печурки
Освен тоа, во некои намирници, витаминот Д е додаден за време на преработката: растителни млека (млеко од соја, грашок или овес), кравјо млеко, јогурти, некои житарки.
2. Додатоци во исхраната
Бројни здравствени организации препорачуваат додатоци во исхраната за доенчиња, кои консумираат мајчино млеко, со оглед дека тоа не обезбедува доволно витамин Д. За постарите деца, разговарајте со вашиот лекар дали има смисла да земаат додаток.
