♦♦♦♦♦♦♦
Медицинската сестра Кејт Фоксал (36) од Бурнмут, Англија, го родила своето второ дете откако таа и нејзиниот сопруг Даниел Банди (37) го победиле коронавирусот, пишува британски „Mirror“
Кејт се заразила во последните недели од бременоста, а вирусот го добила од сопругот. Развила симптоми по неколку дена, по што следувал шок. Даниел се самоизолирал откако го изгубил чувството за вкус и мирис, додека Кејт развила висока температура две недели пред терминот за породување, го изгубила вкусот и мирисот и силно кашлала.
Со тестови било потврдено дека и обајцата се позитивни на коронавирус, а Кејт се плашела за бебето по сè што поминала. Од 2015 година, таа се борела со карциномот на дојка. Била подложена на операција и хемотерапија. Примала хормонска терапија сè додека не добила одобрување за пауза за да поработи на второ дете.
„Ми рекоа дека имам многу мали шанси да забременам. Имав пауза од една година од хормонската терапија. Ми рекоа дека ми е потребна за да не се врати ракот. Пред самиот крај, кога почнав да ја губам надежта, останав бремена. Бевме пресреќни“, вели Кејт.
„Бев многу исплашена затоа што упорно работевме на второ дете. Покрај мојата дијагноза, сега тука се најде и короната“.
Малата Остара била родена на 15 мај, но откако се вратиле од болницата, бебето добило висока температура. „Беше во болница некое време. Се исплашивме, но таа беше тестирана на Ковид-19 и тестот беше негативен. Ни рекоа дека станува збор за вирус, но не за корона“.
„Сега се помина. Здрави сме и пресреќни. Нашиот сон се оствари“, заклучува мајката.
