Заморот од бременоста ве исцрпува, мачнините едвај поминуваат и никако не можете да заспиете. Без разлика дали се работи за несоница предизвикана од стрес, невообичаени соништа за бременост, често мокрење или жиговина, таа и тоа како може да влијае на вашата општа состојба, бидејќи за здраво функционирање ни е потребен квалитетен сон. Несоницата може да се случи во која било фаза од бременоста, а најчеста е во второто и третото тромесечје кога стомакот расте и станува се понепријатно да се наместите во кревет.
Причини за несоница во бременоста
Како и многу иритирачки симптоми на бременоста, несоницата исто така може да се припише и на хормоналните промени. Но, со хормоните, причините можат да бидат различни, а најчести се:
– често мокрење
– жиговина во бременоста
– гадење
– синдром на немирни нозе
– вознемирувачки соништа
– неудобност поради големиот стомак
– премногу активно бебе
– анксиозност и грижи
Повремената несоница не треба да ве загрижува, но хроничниот недостаток на сон за време на бременоста се поврзува со развој на гестациски дијабетес, стрес и депресија. Несоницата, како и честото ‘рчење, се поврзуваат со зголемен ризик од раѓање на преголемо или премало бебе, а исто така може да влијае на должината на породувањето и потребата од царски рез.
Создадете релаксирачка вечерна рутина
Кога ќе се разбудите среде ноќ и не можете повторно да заспиете во рок од 30 минути, станете и направете некоја здодевна работа што ја одложувавте во текот на денот, како мобилно плаќање сметки или чистење на тоалетот, а потоа повторно вратете се во кревет. Можеби нешто такво ќе ве измори доволно и ќе ве подготви за сон.
Не гледајте во часовникот и не броете колку часови сон сте изгубиле. Иако сите зборуваат за минимум осум часа сон, на некои луѓе им треба и помалку да бидат одморени. Наместо тоа, набљудувајте како се чувствувате по будењето, бидејќи доколку не сте хронично уморни, можно е овој број часови сон да ви биде сосема доволен.
Една од главните причини за несоница може да биде прекумерната загриженост и анксиозност поврзани со исходот на бременоста. Разговарајте со партнерот, блиски луѓе или со стручно лице за да разјасните што ве мачи и обидете се да најдете метод за смирување.
Избегнувајте кофеин, чоколадо и јадење доцна. Фокусирајте се на свесното и бавно џвакање, дури и кога ќе ве фати неопислива желба за некоја храна. Пробајте лесни дневни вежби кои би можеле да ви помогнат да спиете, а создадете си и вечерна релаксирачка рутина како што е бања, читање или музика пред спиење. Погрижете се да ја намалите изложеноста на екраните најмалку еден час пред да одите во кревет.
