Најлошо што може да се случи, а не е редок случај, на детето во текот на ноќта нагло да му се покачи телесната температура. Иако е сосема нормално да бидете исплашени, во повеќето случаи не треба да паничите и веднаш да го носите детето на лекар, туку само е доволно да ги преземете следниве чекори за мирно да го дочекате утрото.
Наглото зголемување на температурата, особено ноќе, се очигледен показател дека детето има вирусна или бактериска инфекција. Ако забележите дека неговата температура е повисока од 38, потребно е да го направите следново:
- Прво разладете го детето – тоа значи никако да не го затоплувате, туку напротив, раскомотете го бидејќи ладењето е најефикасниот начин да ја намалите покачената телесна температура додека чекате лекот (антипиретик) да почне да делува.
- Кога станува збор за многу висока температура – над 39-39,5, најдобро “оружје за брзо дејство“ е туширање на детето со млака вода. Треба да се избегнува ладна вода, што е многу непријатно за дете кое “гори“. Наместо туширање, можете да натопите памучна пелена со млака вода, а потоа внимателно да го “оросите“ детето кое седи или лежи. Потоа голото дете се остава да се исуши без покривање. Оваа постапка може да се повтори по потреба, за разлика од лековите кои имаат дефинирани интервали на дозирање.
Лековите за намалување на температура како парацетамол или ибупрофен се најефиксани, само треба да се води сметка колку е препорачната доза и колкави се интервалите помеѓу две дози.
На сите антипиретици обично им треба 15-30 минути (некогаш и подолго) за почеток на дејството. Затоа бидете трпеливи, а ако температурата и понатаму се зголемува, повторете го туширањето со млака вода. Во првите денови од инфекцијата не е реално да се очекува лекот да ја врати температурата на нормални вредности, добро е таа да биде под 38 степени.
Кога мирно можете да го дочекате утрото?
- Кога по давањето на лекот температурата ќе “падне“ под 38.
- Кога детето, по намалување на температурата, ќе продолжи мирно да спие.
Кога навистина треба да отидете на педијатар што е можно поскоро?
- Кога бебето има висока температура во првиот месец од животот, не треба да чекате, туку веднаш треба да отидете кај дежурен педијатар.
- Ако лекот не делува или детето го одбва, а температурата продолжува упорно да расте.
- Доколку и покрај терапијата детето неутешно плаче или состојбата му се влошува.
- Кога детето ќе почне да “грчи“, го вкочанува погледот, не реагира на зборување – тоа се фебрилни конвулзии. Тогаш, треба што побрзо да стигнете на лекар.
Не треба да се плашите, ова се навистина ретки случаи и подобро е да му помогнете на детето мирно да го дочека утрото и да оди на преглед, отколку по секоја цена навечер да го носите во дежурни установи.
