Што кога интензивниот раст предизвикува болка кај децата?

Ако болката трае подолго од две недели без престан, родителите задолжително треба да го однесат детето на лекар.

Децата имаат најмалку два периода на забрзан раст, од четвртата до седмата година и при крајот на пубертетот. Кај некои деца постои уште еден период помеѓу тие два, но тоа е многу индивидуално. Децата интензивно растат во сон и тоа знае да биде многу болно. Се жалат на болките од растот, во колената или во потколениците, навечер или во текот на ноќта.

Тоа се случува кога коските растат и им “зборуваат“ на мускулите дека и тие мораат да се издолжат. Доколку мускулот побавно реагира, процесот може да биде болен.

 Ако болката трае подолго од две недели без престанување, родителите требаат да побараат лекарска помош. Истото важи и ако болката не се намалува преку ден или ако се појават отоци или црвени дамки. Тоа, може да биде симптом на скршеница или детски артритис.

Болките на раст неретко се препишуваат на пребрзиот раст и растегнување на фасциите и лигаментите, односно на неможноста мускулите да го следат наглото растење на скелетот.

Ортопедите советуваат родителите, пред да донесат заклучок дека нивното дете “боледува од растење“, да се консултираат со лекар кој ќе земе анамнеза, а потреба ќе примени и други дијагностички методи, како ултразвук, скенирање или магнетна резонанца. Целта е да се исклучат сите останати потенцијални причинители на болките во телото.

Децата кои чувствуваат болки од растот, може да се занимаваат со сите физички активности ако тие не влијаат на зголемување на болката.