Што навистина открива родилната тежина на бебето?

Колку бебето тежело на породувањето е едно од најчестите прашања што им се поставува на новите родители од членовите на семејството, роднините, пријателите, па дури и непознати лица на улица. Дознајте зошто е толку важна родилната тежина и што зборува за здравјето на детето. 

Зошто постои таква опсесија со родилната тежина? “Општо, родилната тежина може да биде добар показател на здравјето на бебето“, вели д-р Дејвид Хил. Со други зборови, она што сите тие љубопитни луѓе сакаат да го знаат е дали вашето бебе е родено здраво.

Но, додека родилната тежина е “пристоен“ барометар за здравјето, бројката не е совршено мерило. Мало бебе може да има бистри очи и розови образи, додека новороденче со нормална тежина може да има низа здравствени проблеми. Со оглед на тоа, постојат неколку општи насоки кои ќе ви овозможат внатрешен мир, но и ќе ви помогнат да знаете што да очекувате.

Гестациска возраст

Прво, родилната тежина во голема мера зависи од гестациската возраст, односно од тоа колку време детето поминало во матката. За бебињата кои се родени во термин, просечната тежина е помеѓу 2,7 и 4 килограми. Но, за оние бебиња кои се родени или пред или по терминот за породување – просечната тежина е малку поинаква.

“Во повеќето случаи, ако бебето е родено предвреме – ќе биде помало, односно ако е родено по терминот – ќе биде поголемо“, објаснува д-р Хил.

“Затоа, при проценката на родилната тежина прво се проверува гестациската возраст“, вели докторот и додава дека бебето може да биде помало во општа смисла ако е родено во 36-та недела од бременоста, но ако големината на бебето е просечна за 36-та недела, тогаш се смета за просечно.

Бидејќи предвремено родените бебиња ги немаат целосните придобивки од развојот во матката, имаат поголем ризик од здравствени компликации како што се жолтица, анемија, потешкотии со дишењето или проблеми со срцето, поради кои често завршуваат на одделот за неонатална интензивна нега. Но, повторно, само затоа што предвремено роденото бебе е помало од она кое е родено во термино, не значи автоматски дека е и помалку здраво.

Генетика

Дури и бебињата кои се родени на термин или малку подоцна – понекогаш не спаѓаат во категоријата просечна тежина, поради многу причини. Понекогаш е во прашање само генетика, можеби и двајцата родители се ниски или и двајцата се високи и со прекумерна телесна тежина. Најчесто, помала или поголема од просечната родилна тежина – одраз е на здравјето на мајката.

Кога новороденчето тежи помалку од 90 проценти од бебињата на иста гестациска возраст, тоа новороденче се смета за “мало за гестациската возраст“. Малата родилна тежина за гестациската возраст најчесто е резултат на тоа што фетусот не ја примил целосната залиха со хранливи материи или кислород потребни за нормален развој на телото и ткивото. На пример, д-р Хил објаснува како хипертензијата предизвикана во бременоста може да ја намали тежината на бебето. Како и проблеми со срцето, дишењето или бубрезите. Пушењето и консумирањето алкохол за време на бременоста исто така може да бидат причина за мала родилна тежина. “Иако повеќето жени го знаат ова, не можеме доволно да нагласиме колку е штетно пушењето или пиењето алкохол за време на бременоста“, вели д-р Хил.

Од друга страна, ако бебето тежи повеќе од 90 проценти од бебињата на иста гестациска возраст, тоа новороденче се смета за “големо за гестациска возраст“. Големата  родилна тежина за гестациската возраст може да биде предизвикана од тежината на мајката или прекумерните килограми добиени за време на бременоста. Најчесто, големата родилна тежина е поврзана со гестациски дијабетес.

Промени во првите недели

Сепак, д-р Хил заклучува дека без разлика дали новороденчето е родено со мала или голема родилна тежина, сепак може да биде совршено здраво бебе. Новородените бебиња се очекува да изгубат на тежина во првата недела, а додека губењето на тежината од пет проценти е нормално за бебињата кои се хранат со шише, губењето на тежината од околу 7 до 10 проценти е нормално за бебињата кои се доени.

Исто така, треба да се има на ум дека бебињата го враќаат губењето на тежината до втората недела од животот, а ако бебето значително изгубило тежина, е болно или е родено предвреме, може да поминат и до три недели пред да се врати на својата родилна тежина.