Во последно време, феноменот на заборавено дете е се почест, а неретко завршува со смрт на детето, особено во летните месеци и за време на големите жештини.
Зошто се јавува синдромот на заборавеното дете?
Иако самиот феномен не е доволно истражен, се смета дека ова може да му се случи на секого. Сепак, најчесто им се случува токму на родителите на детето. Најчесто се работи за ненамерно заборавање и оставање бебе или мало дете во седиште во автомобил. Се покажало дека заборавањето на детето во автомобилот се случува кога родителите се под голем стрес.
Ова во поголем процент случува во летниот период, поради промена на дневната рутина и одење на одмор, што е и еден вид стрес за организмот. На синдромот на заборавено дете може да влијае и зафатениот распоред, несвесноста за сериозноста на оваа појава, како на пример кога родителите го оставаат детето во автомобил додека одат во продавница затоа што мислат дека ништо страшно нема да се случи, како и промена во распоредот на возење на детето од еден до друг родител кој вообичаено не вози дете, па и не се ни сеќава дека детето е во автомобилот, а до заборавање може да дојде и поради ненаспаност и мултитаскинг.
Освен во лето, кога температурата во автомобилот е двојно повисока од надворешната, оставањето на детето може да биде фатално дури и кога надвор е сончев ден со пријатна температура, бидејќи температурата во затворен автомобил многу брзо се зголемува, а тоа тогаш е опасно за децата, но и за домашните миленици кои се заборавени во автомобилот.
Зошто е опасно децата да бидат долго време во затворен автомобил?
Освен што бебињата и многу малите деца не знаат сами да излезат од автомобилот, има уште една причина зошто ова е опасна појава за нив. Станува збор за тоа што нивното регулирање на топлината не е доволно добро развиено, како кај возрасните. Односно, телото на детето се загрева три до пет пати побрзо од телото на возрасен.
Како последица доаѓа до топлотен удар, односно покачена телесна температура, напади, дехидрација, несвестица, откажување на органите, тешки оштетувања на мозокот и на крајот до смрт. Важно е да се напомене дека сите овие промени може да се случат за многу кратко време.
Може ли да се избегне синдромот на заборавено дете?
За ова никогаш да не се случи, родителите треба детално да се едуцираат, а можат да помогнат и некои едноставни работи кои секој родител може да ги направи пред да вози со своето дете. Пред сè, треба да избегнувате да возите дете по непроспиена ноќ или кога возачот е под стрес.
Важно е да се создадат навики кои секогаш ќе се следат додека се вози детето, на пример често да гледа кон задното седиште или ако е потребно, да постави аларм на мобилниот телефон за приближното време кога се стига на локацијата, што ќе потсети дека има некој друг во автомобилот. Исто така, на совозачкото седиште може да се стави детска играчка или пелени, што ќе послужи како потсетник дека детето е позади.
