Треба ли трудница да врзува сигурносен појас во автомобил?

Врзувањето е најдобра заштита за мајката и за бебето, без разлика на тоа дали сте возач, сувозач или седите на задно седиште во автомобилот.

За време на бременоста секоја жена обрнува посебно внимание на своето здравје, но и на безбедноста. Возењето со автомобил за многу бремени жени претставува нелагодност и непријатност поради врзување појас, страв дека бебето може да биде повредено или поради типични физиолошки промени во бременоста. Честа дилема кај нив е дали треба да врзуваат сигурносен појас за време на возењето во автомобил или не. Одговорот е едноставен и гласи: ДА, треба да врзувате сигурносен појас. Врзувањето е најдобра заштита за мајката и за бебето, без разлика на тоа дали сте возач, сувозач или седите на задно седиште во автомобилот.

Не е само важно да се врзе појасот, туку од големо значење е начинот на врзување на појасот во текот на бременоста.

  • Погрижете се дел од појасот кој минува преку рамената оди помеѓу вашите гради и околу стомакот
  • Уверете се дека појсот минува преку колковите и карличната коска, но под стомакот
  • Ако возите и морате да направите место за стомакот, не поместувајте го седиштето во положба во која не можете да дојдете до педалите
  • Сигурносниот појас никако не смее да минува директно на стомакот.