Цревните вирози се едни од најчестите акутни болести во детската возраст. Се јавуваат преку цела година, а се смета дека децата во просек два пати годишно може да заболат од цревна вироза. Поизложени се децата кои одат во јасли и градинка.
Цревниот вирус кај децата е краткотрајна болест придружена со непријатно чувство на гадење, повраќање и дијареа. За време на болеста, група вируси ги иритираат цревата, а најчести причинители се вирусите (ротавирус, норовирус и аденовирус). Цревните вирусни инфекции се многу заразни, па затоа е важно да се одржува добра хигиена. Миењето раце е најефекасниот начин за спречување на ширење на цревната инфекција.
ЦРЕВНА ВИРОЗА КАЈ ДЕЦАТА – СИМПТОМИ
Ако е во прашање цревен вирус, може да се појават следниве симптоми:
- мачнина
- повраќање
- болки во стомакот
- дијареа
- покачена телесна температура
- намален апетит
Важно е да се нагласи дека не се појавуваат сите симптоми кај сите деца. Најчесто е во прашање комбинација на некои од наведените симптоми. Важно е да се разликува вирусен гастроентеритис од дијареа од други причини. На вирусната етиологија може да се посомнева кога:
- повраќањето е многу изразено
- периодот на инкубација е подолг од 14 часа
- сите знаци на болест се повлекуваат во рок од 3-4 дена.
Покрај честите проливи (повеќе од 3 пати на ден), повраќање и гадење, чести симптоми се и абдоминална болка, надуеност, општа лоша состојба, како и малаксаност и замор поради дехидрација. Понекогаш цревниот вирус може да биде проследен и до температура.
ШТО ТРЕБА ДА НАПРАВАТ РОДИТЕЛИТЕ?
Дехидрацијата е најсериозната последица од губење на телесна течност преку повраќање или дијареа. Најважно е да препознаете дали вашето дете е дехидрирано. Дехидрацијата може да биде блага (губење од 1 до 2% од вкупната телесна течност), умерена (загуба од 5%) и тешка (губење од 10% од течностите). Знаци на блага дехидрација се суви усни и жед.
При умерена до тешка дехидрација има темни кругови под очите, сув и обложен јазик, слабо мокрење (пелената е сува или урината е густа и интензивно жолта), зашилен нос, недостаток на солзи при плачење, треска, забрзан пулс, поспаност. Нелекувана тешка дехидрација, иако многу ретко се гледа, може да доведе до шок, откажување на бубрезите и летален исход.
Во случај на блага дехидрација ретко е потребна посета на лекар. Најважно е да се надоместува течноста на детето (рехидратација) и да се следи неговата состојба. Ако забележите симптоми на умерена до тешка дехидрација кај дете, побарајте итна медицинска помош!
