Резултати од едно американско истражување покажале дека акутното воспаление на средното уво, кое е многу често кај малите деца, може да биде и последица на вирусна инфекција на носот. Имено, вирусната инфекција во носот може да предизвика миграција на бактериите од носот кон увото, како и инфекција на средното уво.
Сите имаме бактерии во носот, но најчесто тие не предизвикуваат проблеми. Меѓутоа, под одредени услови, овие бактерии можат да мигрираат во средното уво и да предизвикаат воспаление на средното уво.
Ова истражување покажало дека вирусот на грип може да предизвика инфекција на средното уво со бактеријата Streptococcus pneumoniae. Инаку, познато е дека споменатата бактерија е присутна во носот на децата во две фази, неинвазивна и инвазивна фаза. Во инвазивната фаза, Streptococcus pneumoniae може да се најде и во инфцираното уво.
Присуството на вирусот на грип во носот предизвикува инфекција со бактеријата Streptococcus pneumoniae, дури и кога е во неинвазивна, бенигна фаза. Се смета дека инфекцијата со вирусот на грип го менува одговорот на имунолошкиот систем на наведената бактерија.
Се проценува дека три од пет деца ќе го добијат своето прво воспаление на средно уво до првата година од животот. До нивниот трет роденден тој број ќе биде 4 од 5 деца, а сите деца ќе имаат барем по едно вакво воспаление до петтиот роденден.
Се смета дека бактеријата Streptococcus pneumoniae е одговорна за 50 до 60 проценти од воспалението на средното уво.
Извор: Infection and Immunity
