Погрешно е мислењето дека сите деца имаат исти симптоми при воспаление на слепото црево. Тегобите најмногу зависат од тоа каде е позиционирано слепото црево, од возраста на детето и од самата реакција на организмот на воспалението. Кај децата помлади од пет години болеста обично се манифестира со зголемена телесна температура, мачнина, повраќање и болки во стомакот.
Постаро дете се жали дека стомакот го боли во пределот на папокот, а болката со текот на времето се засилува и обично се сели во десниот долен дел од стомакот, кога и почнува поинтензивно да боли. Она што е карактеристично е дека детето релативно брзо, за неколку часа, до еден-два дена станува малаксано, не сака да јаде и пие, а стомакот му станува се потврд. Доколку се обидете да го допрете стомачето на детето, тоа чувствува силна болка и нема да ви дава да го допирате.
Најголем број деца со воспалено слепо црево имаат нормална столица или запек, а ретко се случува ова воспаление да е проследено со пролив. Кога болката ќе стане поинтензивна, детето изгледа полошо, а за родителите тоа е знак дека треба веднаш да го однесат на лекар.
Треба да имате предвид дека еден број на деца имаат атипична форма на болеста, кога слепото црево не се наоѓа на вообичаеното место. Исто така, колку е детето помладо, дијагнозата потешко се поставува, оти и тегобите се помалку карактеристични.
ПОСТАВУВАЊЕ ДИЈАГНОЗА
Кога симптомите се карактеристични, дете обично на време стигнува кај детски хирург, кој поставува дијагноза најчесто со помоп на лабораториски анализи на крв и урина. Понекогаш не е лесно да се одлучи дали детето треба веднаш да се оперира. Но, ако лабораториските анализи на крвта и урината покажуваат големи отстапки, детето мора веднаш да биде оперирано. Кога текот на болеста не дава јасна слика на воспаление на слепото црево, се прибегнува кон утразвучен преглед на стомакот. Ова е помошна дијагностика која не е пресудна, но е многу корисна за хирургот кој го следи детето.
