Зошто детето нагло почнува да го боли уво?

Тоа се оние ситуации кога детето изгледа сосема во ред, па одеднаш почнува да плаче, се фаќа за увото кое се повеќе почнува да го боли. Нема висока температура, нема други тегоби, само носот му е малку затнат.

По некое непишано правило, се се случува навечер, или кога сте на пат во странство. Настанува паника и “трчање“  кај лекар.

  • Зошто детето наеднаш почнува да го боли увото?

Увото е полно со нервни завршетоцикои пренесуваат болка, особено средното уво е преполно со рецепроти кои имаат единствена задача да “фаќаат“ болни надразби. Кога притисокот во шуплината на средното уво е зголемен, тоа предизвикува болка. Воспалението на уво е типична причина за болка, но запомнете: не мора да значи дека детето има воспаление на средното ниво, само затоа што го боли увото.

  • Ако не е воспаление на средното уво, за што тогаш станува збор?

Кај најголем број деца кои имаат акутна болка во увото, се работи за минливо запушување на Евстахиевата туба – каналче кое ги спојува средното уво и местото каде носот преминува во грло. Оваа туба се запушува, оти носот е затнат, па течноста од шуплината на средното уво не може да излезе. Овој заробен секрет ги притиска споменатите рецептори за болка и тоа навистина многу боли.

  • Дали детето треба итно да се однесе на лекар?

НЕ, не треба!

Прво треба да му се помогне на детето. Еве што треба да направите:

ЧИСТЕЊЕ НА НОСОТ. Поголемо дете поттикнете да го издува носот, иако тоа понекогаш може краткотрајно да ја засили болката, ќе му помогне на детето да ги “продува“ запушените носни канали. Кај помалите деца, нежно исчистете го носето со стапче, а ако детето има обилен воден секрет, извлечете го со пумпа. Пумпата не ја користете на суво, ако детето нема многу секрет, тоа може да ја засили болката.

СПРЕЈ ЗА НОС. Ставете му на детето спреј кој содржи вазоконстриктор, супстанца која ги стеснува проширените крвни садови во носот. Важно е пред ставањето, да се исчисти носот како што е опишано во претходната постапка, во споротивно нема да има ефект. Кај бебиња и помали деца (пред 6 години), е побезбедно да се користи спреј кој содржи прочистена морска вода.

Во вакви ситуации и одредени сирупи на база на ибупрофен може да бидат од помош, оти освен што ќе ја намалат болката, ќе го намалат и отокот на слузокожата на горните дишни патишта, што олеснува одлевање на заробениот секрет во шуплината на средното уво.

  • Дали на детето треба да му се даде антибиотик?

Не, не треба! Антибиотик се дава само ако постои јасен доказ дека станува збор за гнојно воспаление на средното уво, а за тоа е потребен отоскопски преглед од педијатар или ОРЛ специјалист.

Кога сепак треба да се побара лекарска помош?

  • Ако и покрај отзатнувањето на носот и давањето ибупрофен, детето и натаму плаче и не се смирува, задолжително треба да се однесе на лекар.
  • Ако детето добие висока температура, малаксано е, одбива да јаде… Тогаш треба да се обратите на лекар, дури и ако болката престанала.