Многу луѓе сè уште се придржуваат до „старите“ насоки за симптоми, кои се погрешни, изјави Тим Спектор, професор по генетска епидемиологија на Кралскиот колеџ во Лондон, за „The Independent“. Спектор е коосновач на апликацијата COVID ZOE, која е дел од најголемата светска студија за Ковид. За време на целата пандемија, истражувачите користеле податоци од апликацијата за да ги следат промените во симптомите. „Во овој момент, Ковид кај две третини од луѓето започнува со болки во грлото“, рече тој.
5 главни симптоми на Ковид идентификувани во последните недели
Благодарение на дневните извештаи во апликацијата ZOE COVID Study, тимот кој стои зад апликацијата предводен од Спектор ги идентификуваше петте моментални главни симптоми кои се појавиле во последните недели, а се разликуваат во зависност од бројот на примени вакцини. Рангирањето на симптомите подолу се заснова само на извештаите на луѓето од апликацијата и не зема предвид која варијанта го предизвикала вирусот или демографски податоци. Постојат неколку причини зошто симптомите може да се менуваат, вклучувајќи го и фактот дека оние кои се вакцинирани имаат помалку тешки симптоми и дека повеќе случаи се пријавени од помлади луѓе, за кои е откриено дека имаат поразлични, помалку тешки симптоми.
Симптоми на Ковид кај целосно вакцинирани лица
„Генерално, видовме слични симптоми на Ковид и кај вакцинираните и кај невакцинираните луѓе, според пријавеното во апликацијата. Сепак, оние кои ја примиле вакцината пријавиле помалку симптоми во пократок временски период, што укажува на тоа дека нивната болест била полесна и побрзо закрепнале“, пишува ЗОЕ и го претставува моменталниот редослед на симптоми на Ковид по целосна вакцинација:
Болката во грлото станува доминантен симптом на инфекцијата со КОВИД-19, додека треската и губењето на мирисот стануваат се поретки, според неодамнешните податоци од Велика Британија
- Течење на носот
- Главоболка
- Кивање
- Воспалено грло
- Упорна кашлица
Претходните „традиционални“ симптоми како што се аносмија (губење мирис), отежнато дишење и треска се подолу на листата. Упорната кашлица сега е на 5-то место, па повеќе не е главен показател за Ковид. Забележано е дека луѓето кои биле вакцинирани и потоа биле позитивни на коронавирусот имале поголема веројатност да пријават кивање како симптом во споредба со невакцинираните. Затоа би било корисно луѓето кои биле вакцинирани, а почнуваат да киваат да се тестираат за Ковид, особено ако живеат или работат во близина на луѓе кои се изложени на поголем ризик од болеста.
Симптоми на Ковид кај луѓе кои примиле една доза од вакцината
Редоследот на симптомите се менува по една доза на вакцинација како што е прикажано подолу:
- Главоболка
- Течење на носот
- Воспалено грло
- Кивање
- Упорна кашлица
Како што се гледа, по една доза од вакцината, упорната кашлица како еден од првобитните показатели за Ковид влегува во првите пет симптоми, но сепак е после кивањето и течењето на носот.
Симптоми на Ковид кај невакцинирани лица
Кај невакцинираните симптомите се попрепознатливи според традиционалниот оригинален редослед, но сепак може да се забележат некои промени во споредба со симптомите пред повеќе од една година.
- Главоболка
- Воспалено грло
- Течење на носот
- Треска
- Упорна кашлица
Губењето на мирис е рангирано на 9-то место, а отежнато дишење е далеку подолу на листата, на 30-то, што покажува дека симптомите кои беа претходно забележани се менуваат заедно со развојот на варијантите на вирусот.
