CDC не гледа врска помеѓу миокардитисот и вакцината против Ковид-19

Израелското Министерство за здравство објави дека истражува мал број случаи на миокардитис кај лица кои примиле вакцина на Фајзер, но досега не донесе заклучоци

Тешко е да се докаже поврзаноста затоа што миокардитисот, состојба која често поминува без компликации, може да биде предизвикана од низа други вируси

Американскиот центар за контрола и превенција на болести (CDC) не гледа врска помеѓу воспаление на срцевиот мускул, миокардитис и вакцината против Ковид-19, изјави директорката на CDC Рошел Валенски.

„Не видовме знак, а всушност несакајќи го баравме во повеќе од 200 милиони дози што ги дадовме“, рече Валенски на прес-конференција.

Таа изјави дека CDC е во контакт со Министерството за одбрана на САД во врска со истрагата на 14 случаи на воспаление на срцевиот мускул или миокардитис кај луѓе кои биле вакцинирани во воени здравствени установи.

Израелското Министерство за здравство објави дека истражува мал број случаи на миокардитис кај лица кои примиле вакцина на Фајзер, но досега не донесе заклучоци.

Израелскиот координатор за одговор на пандемијата Нахман Еш рече дека прелиминарната студија покажува „десетици случаи“ на миокардитис кај повеќе од пет милиони вакцинирани лица, главно по втората доза. Тој рече дека не е јасно дали станува збор за невообичаено голема бројка и дали е поврзана со вакцината. Повеќето случаи се забележани кај лица под 30-годишна возраст.

Би било тешко да се докаже поврзаноста затоа што миокардитисот, состојба која често поминува без компликации, може да биде предизвикана од низа други вируси.