Родителите често прават многу работи наместо децата затоа што така сѐ е побрзо, полесно и поедноставно. И реално, понекогаш навистина нема време да чекате пет минути детето само да ја облече маичката или да ја отвори кутијата за ужина.
Но, експертите предупредуваат дека токму преку таквите мали секојдневни ситуации децата развиваат самостојност, сигурност и чувство дека можат нешто да направат сами.
Социјалниот работник во основно училиште, Британи Брејди, која секојдневно работи со деца, сподели неколку важни животни вештини што децата околу петтата година постепено треба да ги учат. Таа вели дека летото е идеално време за тоа, бидејќи нема притисок, а сѐ може да се учи низ секојдневни ситуации.
- Самостојно да се облекуваат
Да, ќе трае подолго. Веројатно маичката ќе биде облечена наопаку, а чорапите нема да бидат исти. Но токму преку таквите обиди децата развиваат чувство на самостојност и доверба во себе.
- Да научат како да се смират кога се фрустрирани
Петгодишните деца сѐ уште учат што да направат кога се лути, тажни или фрустрирани. Затоа е важно да ги учиме на едноставни техники како длабоко дишење, барање помош или кратка пауза за смирување, наместо веднаш да „експлодираат“.
- Едноставни рутини
Малите рутини, како собирање играчки, утринско подготвување или вечерно легнување, им даваат чувство на сигурност и предвидливост. А на родителите често им го олеснуваат секојдневието.
- Преземање мали одговорности
Да ја намести масата, да ги полее цвеќињата, да го нахрани кучето или да ги среди своите работи можеби изгледа како ситница, но преку тоа децата развиваат чувство на одговорност и важност.
И многу сакаат кога чувствуваат дека можат да „помагаат како возрасни“.
- Да се справуваат со разочарување
Нема секогаш да победат во игра. Нема секогаш да бидат први. И нема секогаш работите да испаднат онака како што посакуваат.
Колку и да сакаме понекогаш да ги заштитиме од тоа, токму ваквите ситуации се важни за развојот на отпорност и емоционална зрелост.
- Да побараат помош кога им е потребна
Многу деца се срамат да побараат помош или мислат дека сѐ мораат сами.
Затоа е важно да ги учиме дека не е слабост да кажат: „Не можам“ или „Ми треба помош“.
- Да играат со други деца и да решаваат мали конфликти
Преку играта децата учат многу важни работи: да делат, да преговараат, да чекаат ред и да решаваат несогласувања.
И колку и да им е понекогаш тешко на родителите веднаш да не се вмешаат, токму тие мали конфликти често се важни животни лекции.
- Да се обидат повторно кога нешто нема да им успее
Децата лесно се откажуваат кога нешто не им оди од првпат.
Но токму преку обидување, грешки и повторување развиваат упорност и самодоверба.
- Мали практични вештини што им даваат чувство на независност
Да ја отвори својата кутија за ужина, да облече јакна, да ги измие рацете или да го врзе појасот во автомобил можеби звучи банално, но токму тие мали работи им даваат чувство: „Јас можам сам/сама“. А тоа е многу поважно отколку што понекогаш мислиме.
