Ниту едно новороденче во студијата не било позитивно на SARS-CoV-2
Ниту еден вертикален пренос на SARS-CoV-2, вирусот што ја предизвикува болеста COVID-19, од мајка од бебе, не е забележан во студијата на 64 бремени жени со потврден COVID, се вели во студијата објавена завчера во „JAMA Network Open“.
Додека плацентарното позиционирање на рецепторите на ангиотензин-конвертирачкиот ензим 2 (ACE2) и трансмембранската серинска протеаза 2 (TMPRSS2) – двата главни начини на кои SARS-CoV-2 влегува во клетките – може да обезбеди фетална заштита во матката, истражувачите откриле неочекувано низок пренос на SARS-CoV-2 антитела од мајка на дете.
Студијата, предводена од д-р Андреа Едлоу, специјалист за мајчинско-фетална медицина во Општата болница во Масачусетс и финансирана од Националниот институт за здравство (NIH), се фокусира на мајки во третиот триместар од бременоста, кога се случува највисок трансфер на антитела од мајката.
„Нашето откритие за компромитираниот трансфер на SARS-CoV-2 специфични антитела од мајка на бебе кај инфекции во третиот триместар има импликации за администрацијата на вакцината кај мајката“, вели Едлоу во соопштение за јавноста. „Поточно, нагласува дека бремените жени се клучната популација што треба да се разгледа во воведувањето на вакцините. Исто така, покренува и прашања во врска со оптималниот тајминг на давање на вакцините за најдобро да се поддржи имунитетот на мајките и новороденчињата“.
Нема вирусно оптоварување во крвта на жените
COVID-позитивните бремени жени имале болест која според сериозноста се рангира од асимптоматска до критична. Истражувачите ги споредиле со 63 бремени жени без COVID инфекции и 11 жени кои не биле бремени, а биле во репродуктивна возраст, хоспитализирани поради COVID. Како што напишаа во коментарот д-р Денис Џ. Џeјмисон и д-р Соња А. Расмусен, овие три групи овозможуваат споредби помеѓу трансплацентарниот трансфер на антитела, плацентарната патологија и одговор на антитела на вирусно оптоварување во бременоста.
Ниту едно новороденче во студијата не било позитивно на SARS-CoV-2.
„Оваа студија пружа одредено уверување дека инфекциите со SARS-CoV-2 во текот на третиот триместар веројатно нема да поминат преку плацентата до фетусот, но треба да се направат повеќе истражувања за да се потврди ова откритие“, рече д-р Дијана В. Бјанки, директор на Националниот институт за детско здравје и развој (NIH).
Во нивниот коментар, д-р Џејмисон и д-р Расмусен додаваат: „Ова ги поддржува претходните студии кои имаат откриено дека иако е можно интраутерино пренесување, тоа не е вообичаено“.
(CIDRAP Center for Infectious Disease Research and Policy – The University of Minnesota)
- Линк до истражувањето ТУКА
