Лето е и високи температури владеат низ целата земја. Особено чувствителни на нив се бебињата, малите деца, хронично болните и постарите лица. Меѓутоа, дали знаевте дека топлотниот удар кај децата, во повеќето случаи, воопшто не се карактеризира со потење?
Според Детската болница во Колорадо, постојат три главни реакции на високите температури и топлотните бранови, а тие се:
- Топлотен удар
- Топлинска исцрпеност
- Топлински грчеви.
Топлотниот удар може да се препознае со топла, зацрвенета кожа со температура повисока од 40,5 °C. Повеќе од 50% од децата со топлотен удар не се потат. Топлотниот удар може да предизвика конфузија, кома или шок. Топлотниот удар е итна состојба опасна по живот. Има висока стапка на смртност доколку не се лекува веднаш.
Симптомите на топлотна исцрпеност вклучуваат бледа кожа, обилно потење, гадење, вртоглавица, несвестица или слабост. Може да се појави блага треска помеѓу 37,8 и 39 °C, но најчесто таа отсуствува. Повеќето од овие симптоми се предизвикани од дехидрација од потење.
Лицето кое страда од топлотна исцрпеност може да добие топлотен удар. Сите пациенти со тешки симптоми, како што е несвестица, треба веднаш да се прегледаат. Благите симптоми, како вртоглавица, може да се лекуваат дома со внесување течности и одмор.
Кај топлотните грчеви се јавуваат силни грчеви во нозете и стомакот, а може да се појават и во рацете, иако ретко. Нема температура и кога детето ќе испие течности и ќе се олади, ќе се чувствува подобро. Сите симптоми треба да исчезнат во рок од неколку часа.
За да се навикне телото на високите летни температури потребни се осум до десет дена. Имајте на ум дека оваа ненадејна промена на температурата може да се случи и на одмор.
