Родителите често може да се налутат или збунат кога нивното дете ги игнорира. Но, психолозите нагласуваат дека нашите малечки знаат да не игнорираат од неколку различни причини, а во повеќето случаи тоа нема врска со непослушност. Најчесто се случува кога детето се чувствува неповрзано со нас, го прекинуваме во нешто што во моментот му е многу интересно или едноставно е збунето од нашите упатства и не разбира што точно бараме од него.
Која и да е причината за ваквата нивна реакција, психологот Лора Андерсон Кирби објаснува дека игнорирањето во повеќето случаи не значи дека детето намерно не ги почитува родителите. Таа спомнува и неколку работи кои родителите никогаш не треба да ги прават доколку забележат дека нивното дете ги игнорира.
Една од најчестите грешки што ги прават родителите е да го принудат детето да направи нешто, ако притоа ги игнорира. Како што објаснува психологот, во повеќето случаи детето има разбирлива причина зошто не сака да учествува, а присилувањето на родителите само ќе го направи проблемот уште поголем. Наместо тоа, неопходно е да се покаже сочувство и разбирање.
„Бидете смирени и почекајте ако видите дека детето не ви одговара. Ако мислите дека не ве разбрало добро, повторете го вашето барање и замолете го детето да ги повтори вашите упатства. Имено, во случај да може да ви повтори што треба да се направи, ќе знаете дека вашите очекувања му се јасни“, објаснува Андерсон Кирби.
Исто така, психологот нагласува дека во никој случај не смеете да викате или да користите друг вид на казна. „На тој начин можете само да предизвикате уште поголем отпор кај вашето дете, а тоа секако не е она што вие би сакале“, додава таа.
