Шведско истражување укажува дека децата на мајки со синдром на полицистични јајчници (PCOS) се изложени на поголем ризик од развој на аутизам, што ја поддржува теоријата дека изложеноста на полови хормони во раниот период од животот може да игра важна улога во ризикот од аутизам кај детето.
Истражувањето покажало дека синдромот на полицистични јајчници кај мајката го зголемува ризикот од појава на нарушување на спектарот на аутизам кај детето за 59 проценти.
Исто така, треба да се спомене дека ризикот од аутизам дополнително се зголемува доколку мајката покрај синдромот на полицистични јајчници страда и од обезност или прекумерна телесна тежина.
Жените со синдром на полицистични јајчници имаат зголемено ниво на андрогени, дури и за време на бременоста. Андрогените се полови хормони кои се одговорни за развојот на машки карактеристики, а исто така имаат улога во развојот на мозокот и централниот нервен систем.
Инаку, синдромот на полицистични јајници (PCOS) се јавува кај 5 до 15 проценти од жените во репродуктивна возраст.
Извор: Molecular Psychiatry
