Го носите детето во парк надевајќи се дека ќе го изморите доволно за да заспие во некое разумно време, за да можете и вие да се одморите… Но, во 20-21 часот и натаму имате впечаток дека е “на две места во исто време“. Тогаш, кога конечно ќе заспие во некое време во ноќта, а веќе утрото се буди во шест наутро полно со енергија и подготвено за акција, додека вие не можете да гледате од замор. Ви звучи познато?
Кога бебето се раѓа, родителите мислат дека е најтешко да се успие новороденче. Кога бебето ќе порасне и ќе наполни две, три години, ситуацијата станува многу “посериозна“, Да се успие тригодишно дете може да биде потешко отколку што претпоставувате, а дури и на најтрпеливите родители ќе им се случи детето да ги доведе на ивица на нервен слом.
Ако детето не е наспиено, недостатокот на сон влијае на неговото расположение, однесување, па и навики во исхраната и способноста да се концентрира.
На децата на возраст помеѓу три и пет години потребно им е 11 до 13 часа сон во текот на ноќта, а многу деца отспиваат и по некоја партија во текот на денот. Во предучилишната возраст овие навики се менуваат, па може да се случи дете кое уредно спиело попладне повеќе да не сака да го прави тоа.
“До втората или третата година, повеќето деца спијат два пати во текот на денот“, вели д-р Кристина Бричети, педијатар од детската болница во Балтимор.
“На пет години децата обично отспиваат една партија во текот на попладневните часови, а може да се случи дете на таа возраст воопшто да не сака да спие во текот на денот. Ако детето во текот на денот е добро расположено и не е плачливо и нервозно, нема потреба да инсистирате на спиење во текот на денот“, додава таа.
Ако децата се заморат во текот на денот, тоа се одразува и на вечерната рутина, а како последица се јавува отежнато успивање. Затоа, треба на детето да му испланирате време за одмор во текот на денот, па дури и ако не сака да спие. Доволно е да се врати од надвор, од прак и трчањето по дома да се замени со некоја лежерна занимација.
