Очите и носот се поврзани со неколку премини, како солзните канали, но колку што им е досега познато на научниците “нема ништо што би упатувало на тоа дека очите се важна влезна или излезна точка за коронавирусот“, вели Клеменс Ланге, офталмолог и професор за очни болести во Унивезитетската болница во германскиот град Фрајбург.
Но, ако имате коронавирус на рацете и потоа ги протриете очите, “пренесувањето на вирусот до назалната слузница и потоа до респираторниот тракт не е невозможно“, вели проф. Ланге.
Неколку студии укажуваат на тоа дека луѓето можат да се заразат преку конјуктивата, слузница која го покрива внатрешниот слој на очниот капак и белката. Но, допрва треба да се утврди дали на површината на окото остануваат доволно клетки кои на вирусот може да му овозможат да продре во организмот, вели проф. Ланге.
Во помала студија спроведна на 46 пациенти, ниту еден од нив во конјуктивата немал доволно рецептори преку кои вирусот би успеал да навлезе во клетките, додава тој.
Според него, мала е и веројатноста дека вирусот може да се пренесе преку солзна течност.
“Трепкањето и ограничената површина на окото би требало да спречат, доволна количина од вирусот да влезе во окото за да се заразите“, објаснува професорот.
Притоа, солзната течност на заразните лица ретко содржела вирусен генетски материјал, истакнува офталмологот и додава дека таквиот тип на пренесување на вирусот се уште не може да се исклучи.
“Иако во моментов не треба да се плашиме од инфекција со коронавирус преку очите, потребно е да се спроведат дополнителни истражувања“, подвлекува проф. Ланге.
Иако се чини дека ризикот е мал, на болничкиот персонал и натаму му се препорачува носење на заштитни очила за време на контакт со заболени од КОВИД-19, особено на одделите за интензивна нега.
