‘Рбетот има природно искривување за да се распредели тежината на телото, но кај сè поголем број деца се јавува сколиоза, односно состојба во која рбетот добива облик на буквата S. Се смета дека детето има сколиоза доколку искривувањето на ‘рбетот е поголемо од десет степени.
Може да се појави како компликација на полиомиелитис, мускулна дистрофија и други нарушувања на централниот нервен систем, но четири од пет случаи кај децата се идиопатски, односно од непозната причина.
Симптоми на сколиоза
Не е секогаш лесно родителите да препознаат некои проблеми со ‘рбетот кај децата, но еве кои симптоми може да укажуваат на сколиоза:
- Впечатливо искривување на горниот дел од телото
- Неизедначени, заоблени раменици
- Вовлечени гради
- Наведнатост на телото на едната страна (поради закривениот ‘рбет)
- Болка во грбот (ретко)
Сколиозата може да се развива со месеци и години, така што може да ја открие само педијатар при преглед на грбот на детето. Прогресијата може да се случи брзо за време на наглиот раст на тинејџерите.
Кај едно од седум млади лица со сколиоза се јавува големо искривување и потребно им е лекување.
Третман на сколиоза
Во зависност од искривувањето на ‘рбетот, може да биде неопходно да се носи корективен мидер или ортоза. Овие помагала се носат поголемиот дел од денот се додека не заврши растот на ‘рбетот, што е обично околу 17-18 години за девојчиња и 18-19 за момчиња.
Во случаи кога искривувањето на ‘рбетот е 50 или повеќе степени, обично се препорачува хируршка процедура со која се спојуваат зафатените пршлени со помош на метални шипки и завртки за да се стабилизира тој дел од рбетот додека не се спои целосно, што во просек трае околу 12 месеци.
