Ноќните ужаси (стравови) се честа појава кај децата, особено во предучилишна возраст. Иако можат да бидат многу страшни за родителите, тие се нормална појава и се дел од развојот. Тие обично не се поврзани со сериозни емоционални или психолошки проблеми. Според педијатрите, ноќните стравови може да се влошат ако детето е болно и има треска или ако е многу загрижено за нешто.
Ноќните ужаси се многу драматични будења што се случуваат во текот на првите неколку часа од спиењето. Детето може да изгледа крајно возбудено и вознемирено, а многу е тешко да го утешите. Овој тип на стравови не е ист како кошмарите, односно грдите и лоши соништа. Педијатрите објаснуваат дека околу пет проценти од децата имаат ужаси за време на спиењето, но тие нема да имаат долгорочни последици бидејќи малечките најчесто ги надраснуваат. Прекумерниот замор и недоволниот сон исто така може да ги влошат.
Знаци и симптоми на ноќни стравови
Како што објаснуваат лекарите, ноќните ужаси обично започнуваат со ненадеен крик. Вашето дете може да изгледа многу исплашено, дури и да трча низ куќата. Тоа често нема да забележи ако се обидете да го спречите или да го утешите. Освен тоа, детето обично дише забрзано, се јавува зголемено потење и може да има отворени очи со „стаклен“ поглед. Најчесто никого нема да препознаат, траат околу пет до десет минути и можат да се случат неколку пати во текот на истата ноќ.
