Зошто детето во зима има повеќе секрет во дишните органи?
Тоа е резултат на поголемиот број на вируси кои ги напаѓаат дишните органи. Ним им годи студеното време, но затворениот простор во кој престојуваат многу луѓе и деца, одговара за нивно ширење. Тоа се респираторни вируси, ги има многу видови, а неретко се случува слично да се манифестираат кај децата во вид на течење на нос, кашлање, а понекогаш и со забрзано и отежнато дишење.
Речиси сите имаат една заедничка карактеристика – создавање на секрет (мукус) во дишните патишта.
- Дали е ова всушност астма?
НЕ Е. Астмата е болест каде се јавува стеснување на дишните патишта – бронхоопструкција! Кога овие опструкции се повторуваат се појавува астма. Кога белите дробови на детето се чисти, тоа значи дека нема стеснување на дишните патишта – бронхоопструкции, и тоа не е астма.
- Каква е разликата помеѓу астма и бронхитис?
Бронхитис има повеќе видови, но ако бронхитисот се повторува и е проследен со бронхоопструкција, тогаш всушност се работи за астма. Кога бронхитисот се јавува ретко, а е предизвикан од натрупување секрет во бронхиите, тогаш тоа не е астма, туку вирусно воспаление на бронхиите.
- Може ли ова да се претвори во воспаление на бели дробови?
Тешко – шансите се мали! Кога секретот долго се задржува во бронхиите и не се исфрли како што треба, постои ризик од настанување на воспаление на белите дробови – пневмонија.
- Дали може да помогнат инхалациите?
Можат! Иако е секретот високо во носот, грлото и во трахеите, инхалациите може да помогнат, дури и кај постари деца. Погрешно е да се мисли дека инхалаторите се само за бебиња.
- Со што да се инхалира детето?
За почеток доволно е тоа да биде инхалација со обичен физиолошки раствор. Тој ќе помогне да се разреди секретот и така полесно да се исфрли (искашла или проголта). Ова изгледа банално, но е одличен начин да му се помогне на детето.
- Колку долго и колку често се прават инхалациите?
Нема стриктни правила – три пати дневно, околу 5 минути е сосема доволно, па да се види како детето ќе реагира. Инхалациите се спроведуваат пред или помеѓу оброците, а никогаш после јадење. По потреба може да се зголеми бројот на инхалации, и нема опасност да се претера.
