Месото содржи есенцијални аминокиселини кои се неопходни за правилен раст, развој и созревање на бебињата. Со воведувањето на оваа важна намирница во исхраната, детето пред се ќе ја задоволи потребата од железо и тоа во форма која организмот ја користи пет пати подобро од железото во зеленчукот, овошјето, житарките или млечните производи. Покрај тоа, богато е и со цинк, минерал важен за зајакнување на имуниот систем. Ќе спречите и појава на анемија, бидејќи месото е богато со витамини од групата Б, кои се неопходни за секојдневните активности, особено со витаминот Б12.
Воведувањето на месото обично почнува во шестиот месец со давање на супи, односно зеленчук и течноста во која тој се варел заедно со месото. На овој начин се започнува со постепено навикнување на нови вкусови, кои се нови за организмот на бебето. По 3-4 дена, можете да почнете со блендирање на парчиња месо со зеленчук.
Во исхраната на бебето прво треба да се воведе бело месо од живина (пилешко и мисиркино), и тоа без кожа – затоа што најлесно се вари, не е масно, а е богато со висококвалитетни протеини и корисни аминокиселини. Можете да воведете и месо од многу млади животни, кое е помеко (телешкото и јагнешкото месо се богати со хранливи материи, железо, витамини и минерали). Темното месо од живина најчесто се воведува по десеттиот месец, додека црвеното месо (јунешко и говедско) се препорачува по навршување на една година. Свинското месо последно се воведува во исхраната на децата, бидејќи е премногу масно и тешко се вари.
Иако месото е идеален оброк кој заситува, педијатрите не препорачуваат да се дава секој ден. Само водете сметка да не ставате жолчка од јајце во истиот оброк (ако веќе сте ја вовеле), се препорачува овие намирници да се даваат наизменично. Подгответе го месото така што ќе го варите во вода или на пареа. Важно е да се погрижите месото да не е преварено, бидејќи тогаш ќе стане премногу тврдо и жилаво, а потоа и потешко за варење на вашето бебе. Месото во почетокот треба да се дава пасирано (многу ситно исечкано), а подоцна да се сечка на парчиња.
Исто така, внимавајте со количината на месо што ја ставате во бебешката кашичка. Големото количество на протеини може да ги оптовари бубрезите. Затоа се препорачува редовно да се дава мала количина на месо измешано со зеленчук. На почетокот во кашата од зеленчук ставете само неколку мали коцки месо.
