ШТО Е НЕПРАВИЛНО ДРЖЕЊЕ?
Неправилното или лошо држење е неправилен однос на мускулно-коскените структури без анатомски промени на ‘рбетот. При неправилното држење, оптоварувањата кои делуваат на телото не се пренесуваат рамномерно долж ‘рбетот и телото, што доведува до зголемено оптоварување на коските, мускулите и зглобовите.
Неправилното држење е честа појава и се јавува кај 20 до 25% од децата на училишна возраст. Меѓу другото, предизвикано е од долготрајно седење, носење тешки училишни чанти, недоволна физичка активност, како и од нагло раастење во адолесценцијата.
Неправилното држење на телото може да предизвика болки во вратот, грбот, рамената, нозете, а се поврзува и со главоболка, замор и стрес. Долгорочно, може да доведе до сериозни мускулно-коскени пореметувања.
ШТО Е СКОЛИОЗА?
Сколиоза е најчест деформитет на ‘рбетот, а се јавува кај 2-3% од општата популација. Долго време, сколиозата се дефинирала како секое искривување на ‘рбетот настрана при кое ‘рбетот може да поприми форма на буквите С или Ѕ. Денес се дефинира како тродимензионална деформација на ‘рбетот која покрај странично искривување, вклучува и ротација на ‘рбетот и промена на профилот.
Најчесто сколиозата е идиопатска, што значи од непозната причина. Може да се јави во било кој период од детството и адолесценцијата.
Зависно од возраста се разликува: инфантилна ( од 0. до 3. година), јувенилна ( од 4. до 9. година) и адолесцентна ( од 10. до 18. година).
КОГА ТРЕБА ДА СЕ ПОСОМНЕВАТЕ НА СКОЛИОЗА?
На сколиоза може да се посомневате ако кај детето забележите еден или повеќе од следниве симптоми:
- Едното рамо е поставено повисоко од другото (рамената не се со еднаква положба и висина)
- Главата не е на средина на телото, односно не ја следи линијата на ‘рбетот
- Лопатките не се на иста висина и не се еднакво поставени
- Видлива е разлика во положбата и висина на колковите
- Забележлива е разлика во должината на рацете кога детето стои
- Во исправена положба, рацете не се еднакво положени покрај телото т.е. гледано од страна, десната и левата рака не стојат симетрично во однос на трупот
- При наведнување нанапред, кај детето е видлива разлика во висината на десната и левата страна на телото, едната страна е поистурена/позилезена.
