Новороденчето има кожа, која според педијатрите е неколку пати почувствителна од онаа на возрасните. Лојните жлезди кај бебето се уште не се подготвени за работа, а хидролипидниот филм, односно слојот од вода и себум кој служи како бариера против надворешните влијанија, многу е тенок. Од тие причини, потенцираат педијатрите, треба да се внимава да не се претера со максималната хигиена, особено на кожата на лицето кај бебето. Прекумерното миење и преагресивните производи за хигиена ја слабеат недоволно развиената заштитна бариера на кожата на бебето.
1. Еднаш дневно, најдобро наутро, треба да се посвети на нега на очите на детето
Користете памучни дискови натопени во млака вода или физиолошки раствор и исчистете го окото, почнувајќи од надворешниот агол кон внатрешниот. За чистење на другото око користете нов памучен диск, како би спречиле пренос на евентуална инфекција.
2. За чистење на ушите користете намотано парче памук
Детето треба да лежи на грб, со главата наведната на една страна, а се чисти само надворешниот дел од увото. Никако не користете класични стапчиња за уши, оти постои опасност да продрат во слушниот канал, да го притиснат церуменот на дното на каналот и да се спречи да излезе по природен пат.
3. Нега на носот
Носето негувајте го така да главата на детето ја наведнете наназад и нежно во ноздрите вовлечете парче памук натопено со физиолошки раствор. Така ќе ја отстраните слузта и ќе му олесните на детето да кивне.
4. Хигиена на устата
За хигиена на устата, на показалецот намотајте стерилна газа натопена во превирена млака вода и со него поминете преку непцата на детето. На тој начин ќе ги отстраните остатоците од плунка и млеко.
