♦♦♦♦♦♦♦
Коронавирусот предизвикува мозочни удари кај возрасни лица помеѓу 30 и 40 години, а кои немаат посериозни симптоми на коронавирус, предупредуваат лекарите, а јавува Си-ен-ен.
Тие велат дека има се повеќе докази дека коронавирусот може да предизвика неприродно згрутчување на крвта, кое доведува до мозочен удар.
Томас Оксли, неврохирург во болницата „Монт Синај“ во Њујорк кој со колегите лекувал пет пациенти, објави детали за нивното лекување. Сите имале помалку од 50 години и биле со благи симптоми на коронавирус или воопшто немале симптоми.
„Изгледа дека вирусот предизвикува зголемено згрутчување во големите артерии што доведува до тешки мозочни удари“, изјави д-р Оксли за Си-ен-ен.
Тој објаснил дека нивните податоци покажуваат седумкратно зголемување на ненадејните мозочни удари кај млади пациенти и тоа во последните две недели. Повеќето од тие пациенти претходно не биле болни и седеле дома со слаби симптоми или воопшто немале никакви симптоми. „Сите беа позитивни. Двајца не повикале веднаш брза помош“, вели Оксли.
Има се повеќе докази дека коронавирусот може да предизвика неприродно згрутчување на крвта, кое доведува до мозочен удар
Ако дојде до мозочен удар поради запушување на големите садови, во мозокот може да дојде до сериозни оштетувања ако тромбот не се отстрани веднаш. Најмалку еден пациент починал, а останатите се на рехабилитација, на интензивна нега или специјален оддел за мозочни удари.
„Само еден пациент е пуштен дома, но ќе му треба посебна нега“, вели д-р Оксли за Си-ен-ен.
Докторот и неговиот тим апелираат луѓето да обратат внимание не само на симптомите на коронавирус, туку и да повикаат брза помош ако забележат какви било знаци на мозочен удар. „Најефективниот третман за мозочен удар поради запушување на големите садови е да се отстрани тромбот, но мора да се изврши во рок од шест часа, понекогаш во рок од 24 часа“, објаснил неврохирургот.
