НЕДОСТАТОК НА ВИТАМИН Д: Постпородилната депресија е поврзана и со дневната изложеност на сончева светлина

Истражувањата веќе претходно потврдија поврзаност на депресијата со недоволниот престој на отворено.

Постпородилната депресија е почеста отколку што се зборува за неа, а значително влијае на физичкото и менталното здравје на жената, закрепнувањето од породувањето и поврзувањето со бебето. Истражувањето спроведено на Универзитетот Калифорнија во Сан Франциско го покажало влијанието што недостатокот на витамин Д и недостатокот на изложеност на сончева светлина во третиот триместар го има врз развојот на постпородилна депресија.

Големата улога на витаминот Д

Рутинското следење на нивото на витаминот Д во организмот главно не се правело, иако неговото влијание врз различни состојби како бременост, автоимуни или воспалителни болести е доста силно. Дури неодамна лекарите почнаа да посветуваат се поголемо внимание на мерењето на витаминот Д кај различни состојби.

Бидејќи повеќето луѓе поминуваат голем дел од денот во затворени простории, дефицитот на витамин Д станува се почест. Истражувањето покажало дека жените чиј трет триместар се совпаѓа со летото и пролетта, односно со сезоната која носи повеќе сончеви денови, имале најмал ризик да заболат од постпородилна депресија.

Жените кои го имале последниот триместар во период кој се карактеризира со помалку сончеви часови имале поголем ризик од развој на депресија, како и поголем интензитет на симптоми.

Животен стил и суплементација

Лекарите би можеле да го искористат ова истражување за навремено да го измерат нивото на витамин Д кај бремените жени и да препорачаат суплементација, доколку е потребно.

За трудниците, овие податоци можат да потврдат колку е важно навреме да се информираат за можните тестови, суплементи и начин на живот кој вклучува доволно време на отворено.

Тешко е да се планира зачнување земајќи ги предвид годишните времиња и периодот во кој жената ќе биде во последниот триместар, но за жените кои имале проблеми со депресија во минатото, ваквото планирање би можело да помогне.