Среќното детство е идеална основа за подоцнежниот живот, а луѓето што сме ги запознале, активностите што сме ги правеле како деца, оставаат длабока трага на нас и кога ќе пораснеме.
Како родител, веројатно илјада пати сте се запрашале што можете да направите за да му овозможите на вашето малечко среќно и здраво детство – еве ги одговорите.
Среќните деца имаат родители кои се грижат за нив со многу топлина
Топлото и одговорно родителство е еден од најважните услови за среќно детство, пишува parentingforbrain.com. Родителите кои секогаш одговараат на потребите и однесувањето на своето дете прават малото да се чувствува безбедно и дефинитивно му создаваат убави спомени од детството.
Среќните деца имаат емоционална поддршка од возрасните
Емоциите се многу важни за нашиот мозок. Всушност, лесно е да се израдуваат децата, доволно е да се игра со нив. Едно истражување покажало дека децата на возраст меѓу шест и 12 години покажуваат високо ниво на позитивни емоции, но како што стареат, нивото на позитивни емоции се намалува. Со други зборови, најмладите се најзадоволни од својот живот, а еве зошто.
Среќното детство не значи само позитивни искуства и создавање убави спомени, туку и поддршка и помош за прифаќање на негативните емоции во тешки околности. Затоа, кога мало дете има излив на бес, покажете му сочувство и помогнете му да ги регулира своите емоции, така што во одреден момент ќе научи да ги регулира самостојно. Секогаш покажувајте дека ги почитувате емоциите што ги чувствува детето и научете го како да се справи со сите чувства.
Среќните деца имаат добри меѓучовечки односи
Среќата може да се најде во добри односи со пријателите или членовите на семејството. Перцепцијата на среќата кај децата многу зависи од нивниот однос со нивните пријатели и родители. Убавите зборови од семејството и пријателите му помагаат на детето да биде среќно.
Среќните деца имаат добри примери
Усвојувањето на одредени вредности или однесување од страна на родителите може да придонесе за среќата на децата. Научниците тврдат дека среќата од родителите може да се пренесе на децата преку нивните вредности и однесување.
Ставањето на семејните вредности пред материјалните, како и одржувањето на здрава рамнотежа помеѓу работата и одморот, ќе придонесе за среќата на децата.
Среќните деца се чувствуваат корисни
Вклучете ги децата во активности за кои покажуваат интерес и помогнете им да се чувствуваат корисни, што ќе ги направи среќни. Кога детето чувствува дека неговите родители или наставници го ценат, тоа го мотивира да биде уште подобро. Затоа, мотивирајте го детето фалејќи го неговиот труд, напредок, способности и таленти.
Среќните деца го контролираат својот живот
Родителите кои премногу ги контролираат своите деца можат да ги зголемат шансите да развијат анксиозност и депресија и воопшто да ги направат помалку среќни. Се разбира, детето на одредена возраст не е способно самостојно да носи многу одлуки, но важно е да одлучи што е соодветно за неговата возраст. На пример, родителите не треба да се мешаат во пријателствата на нивните деца или во она што детето ќе го работи кога ќе порасне.
Родителите ги учат среќните деца, не ги казнуваат
Децата кои се дисциплинирани и не казнувани покажуваат просоцијално однесување, што придонесува за нивното чувство на среќа.
Среќните деца се благодарни
Децата кои се благодарни наоѓаат повеќе среќа во некои возбудливи настани, а исто така воспоставуваат подобри социјални врски и се позадоволни од секојдневниот живот.
Среќните деца учествуваат во социјални активности
Учество во активности кои на некој начин придонесуваат за заедницата или општеството, им помагаат на децата да развијат чувство на припадност и ги прават посреќни.
Среќните деца се физички активни
Физичките активности можат добро да влијаат на расположението на децата, а секојдневното вежбање е поврзано со бројни добри ефекти врз среќата, самодовербата…
Среќното детство е важно за развојот на детето, но тоа не значи дека родителите треба да се грижат детето да биде среќно секоја секунда. Тоа не е ни возможно, тоа мора да доживее некои „негативни“ искуства од кои ќе научи нешто – мора да си ја одработи домашната задача и кога не му се пишува, понекогаш тимот за кој игра ќе загуби натпревар, родителите ќе го исклучат интернетот… Ништо од ова нема да го усреќи детето, но секако има некои добри ефекти врз него бидејќи развива толеранција кон фрустрација.
Значи, не е неопходно детето да има „совршено“ детство за да биде среќно. Тоа што ќе го сакате и ќе му бидете поддршка секако е доволно за да биде среќно и да ги надмине сите предизвици со кои ќе наиде.
