Потребно:
- 300гр брашно
- Малку сол
- ½ лажичка шеќер
- 2 пакетчиња сув квасец
- 200мл топла вода
- 6 лажици маслиново масло
- Крупна морска сол
- 6 шери домати
- Рузмарин
Подготовка: Загрејте ја рерната на 200 степени. Во поголем сад ставете го брашното, додадете ја солта и убаво измешајте. Потоа во брашното направете вдлабнатина. Посипете со шеќер, а потоа додадете го и квасецот во неа. Повторно добро измешајте. Додадете 3 лажици масло и постепено налевајте ја топлата вода. Замесете меко тесто. Формирајте топка и покријте ја со превртен сад. Оставете го тестото околу 10 минути да се “опушти“. Намачкајте го тавчето за печење со масло и на него развлечете го тестото со раце (во форма на круг или правоаголник; можете да го поделите тестото и да формирате неколку помали фокачи). Посипете со крупна морска сол и покријте со чиста кујнска крпа, па оставете да нарасне на топло место околу 30 минути. Шери доматите исечкајте ги на тенки парчиња и распоредете ги преку тестото. Со врвовите на прстите направете вдлабнатини во тестото на места каде што нема домати, прелијте со преостанатото маслиново масло и наросете рузмарин. Печете 15 до 20 минути. Добар апетит!
