РЕЦЕПТ НА ДЕНОТ: Кашичка од суви сливи, јаболка и амарант 7+

Амарантот, заедно со киноата е уште една житарка која кај нас не многу се користи, иако може веќе извесен период да се најде по продавниците. Амарантот не содржи глутен, богат е со белковини и се препорачува кај лицата кои не внесуваат месо. Содржи и висок процент на аминокиселини. Богат е и со калциум, влакна, железо и лесно се вари. Поради високиот процент на калциум и влакна, како и останатите состојки, амарантот може да се воведе во исхраната на бебето веќе од шестиот месец. Оваа кашичка, поради сувите сливи се препорачува за деца со навршени седум месеци од животот.

Потребно:

  • Мала шолја амарант
  • Половина јаболка исечкана на парчиња
  • Пет до седум суви сливи

Подготовка: Амарантот варете го во три шолји вода, во тенџере на кое подоцна ќе можете да додадете и сад за готвење на пареа, за да може да ја синхронизирате постапката и да заштедите време. По 15. минути варење, додадете на теџерето сад за готвење на пареа и ставите ги исечканите јаболки и сувите сливи. Поклопете и оставете да се да се готви уште 15 минути. Амарантот е многу ситен и испушта слуз додека се вари. Процедете ја течноста ако останало вишок, измешајте со јаболката и сливите. Користете блендер или вилушка, според потребите на вашето бебе. Може оваа кашичка да ја комбинирате и со некое свежо сезонско овошје, кое вашето дете веќе го пробало, како банана, тиква…